Kulis.az Fərid Hüseynin ədəbi təriflər haqqında "Bazar olsun" adlı yeni yazısını təqdim edir.
Ədəbi mətnləri "bal satan kimi" tərifləmək artıq kütləvi hala çevrilib.
Çox nadir hallarda bədii əsərlər haqqında maraqlı yozum, ağlabatan təhlil, biliklərin cəmindən yoğurulmuş qənaətlərə rast gəlmək olur.
Ədəbi mətnlərin "şərhçiləri" "balsatanlığı" bilərəkdən və ya "bilməyərəkdən" adətə çeviriblər, onların başlıca məqsədləri şərhə, fikirləri açmağa yox, sadəcə tərifi, yaxud "topuqdan düşüncələrini" sırımağa hesablanıb.
Sırımağın ən bariz göstəricilərindən biri də məqalələrdə "filan şey filan şeydir", "əsl yazıçı filan işi görə biləndir", "əsl söz burdan başlayır", "həqiqi ədəbiyyat orda bitir", "baxın istedad budur" kimi ucuz, əttökən təsbitlər, dayazlıqla "zinətlənmiş" yekun "nəticələrdir".
Bu cür aldanışlarla qəddi kaman kimi əyilən, saçları ağ tellərin işğalına məruz qalan xeyli adam dirigözlü "öldü", yaxud gözüçıxmış ustadlarından dərs almayan, əksinə aldanışa "onlar kimi olmağa" can atan, sentimental "dartınmalarla" özlərini, həqiqi kimliklərini ifadə etməyən, "süslü" cümlələrlə göz boyamağa aludə olmuş "aycan-aycan" ədəbi gəncliyinin də sıraları xeyli genişləndi.
Təəssüf ki, hələ də bizi ən çox "sevənlərin", bəyənənlərin" əksərən bizi ən çox aldadanlar olduğunu görmürük.
Nə deyək, "bazar olsun". Onsuz da balı arıdan başqa "hamı" tərifləyir...
