Kulis.az Səməd Ayxanın şeirlərini təqdim edir.

Necə ki varlığın əlçatmaz sənin -

Eləcə dərdinə dərd çatmaz sənin.

Dərdin özündən də bəlkə böyükdür,

Yaratdın dünyanı...

Və dərdə düşdün.

Hər yerdə qan-qada,

hər yerdə qırğın,

İnsan bir-birinə leş üstdə - qırğı.

Xaraba şəhərlər, sürünən kəndlər,

Zavallı şeytana papış tikənlər.

Acından özünü satan kimsələr,

Minillik günaha batan kimsələr.

Silah dəllalları, narkobaronlar,

İnsan həyatına tələ quranlar.

Müftəxor, bürokrat siyasətçilər

Ölüm meydanına bic bələdçilər.

Uşaq qənimləri, ölüm divləri,

Cübbəli riyakar din xadimləri.

Qadın tacirləri, "ilahibaş"lar

Fahişə düzəldən heykəltəraşlar....

Bu qədər ağrılı haqsızlıqlara

Necə tab gətirir ürəyin, Allah?

Niyə öldürmürsən biryolluq bizi,

Yoxsa bizdən çıxır çörəyin, Allah?

***

Əlini çək üzünə,

"Fatihə" ver bu eşqə.

Boynuma alıram ki,

Sənə yalan demişəm...

Daha məndən uzaq dur,

Ömrüm qaraçuxadı.

Ha sıxdımsa özümü,

Məndən adam çıxmadı.

Səni dərdə salmışam,

Dərddən uzaq qalmışam.

Hələ böyüməmişəm,

Hələ uşaq qalmışam.

Bu qədər il xərclədin,

Mənə sevgi düşdümü?

Qazandığın nə oldu -

Adi içki düşkünü?!

Əlini çək üzünə...

Sil gözünün yaşını.

Bağışlama sən məni,

At bu eşqin daşını.

***

Nə vaxtdır ağlamırsan.

Qorxursan

göz yaşından tutub

gözündən düşəm!?

İnana bilməsən də,

inanmaq istəmisən

bu sevgiyə həmişə.

Sən mənə istiqanlı,

mənə doğma olmusan.

Qəlbində yaşasam da

bəlkə fikrən öldürüb

saçını da yolmusan.

Soyuq təbəssümünlə

indi yas saxlayırsan?!

Göz yaşınla bəlkə də

nəşimi suya çəkib

məni torpaqlayırsan?!

Düz edirsən, ağlama!

Ağlamasan yaxşıdır.

Mən cismən öləndə də

qəti qara bağlama!

Bağlamasan yaxşıdır.

***

Bir məktub yazasan, "Kimə" yeri boş,

Adam tapmayasan xatirələrdə.

Bir kimsə olmaya gəlib görə ki,

Məktub yazırsanmış öldüyün yerdə.

Dörd yanda adamlar qarışqa kimi,

Hər gün biri ölə, mini doğula.

Sən də boğulasan tənhalığında,

Kimsə soruşmaya: "Kimdir boğulan?"

Bütün yaxşılarçün olan vadidə

Sən yaxşı olsan da, evin olmasın.

Ağrıyan olmasın tənhalığına,

Səni əvvəlkitək sevən olmasın.

• 8 yaşlı oğluyla şəhid olan xanəndəmiz - Erməni qadın onu niyə 7 il həbs etdirmişdi?
• Aktyordan nazirliyə müraciət: "Belə mədəniyyətsiz gənclər harada yetişir?"
• Alfred Şnitkeyə həsr olunmuş gecə keçiriləcək