Kulis.Az “Qaynana” serialının məşhur aktyoru Kənan Yusifovun şeirlərini təqdim edir.

Bağışlayın!

Mən standartlara girmədim

Bağışlayın məni

Hər səhər qalstukumu taxıb

Kreditlə aldığım “Hunday”a minə bilmədim

Lap əvvəldən altı yüz balla

Min bir cah-calalla

universitetə girə bilmədim

Bağışlayın

Bu uşaq kəllədi,

Kitab əlindən düşmür,

Riyaziyyatın atasıdı

Bir dənə qızla görüşmür

Siqaret çəkmir

Avara-avara gəzmir

Heç kimin əngini əzmir

Deyə bilmədiniz mənim üçün

Bağışlayın məni

Nə həkim, nə müəllim

Nə bank işçisi

Nə elm bilicisi

Nə də alim olmadım

Savadımla müəllim gözünü oymadım

Bağışlayın məni

Toyda hansısa filankəsin qızına

Yaxşıdı gedin

Filan restoranda toyumu edin

Deyə bilmədim sizə

Qohum qızı gətirmədim evimizə

Bağışlayın məni

Mən mən olduğuma,

Fərqli doğulduğuma görə

Bağışlayın.

Deyirsən də...

Deyirsən gedirəm

Deyirsən yetim qoyacam səni.

Mənim yetimlikdə on doqquz il stajım var,

Sənin getməyin nə yazar, yetimlik kitabçama ?

Deyirsən sevmirəm

Deyirsən nakam qoyacam səni.

Mən nakamlar binasında zirzəmi siçovulu

Bir pendir parçası qədər də dəyərin yox.

Deyirsən ağlayacaqsan

Deyirsən yasa boğacam səni.

Mən öz içimdə mərsiyə oxumağı arzulayan mollayam

Gülə-gülə halva yeyən ədəbsiz gəncə bənzədin sən də!

Deyirsən unutma

Deyirsən döndüm bəlkə.

Elə bil mən stansiya, sənsə qatarsan

Relslərsə dairəvi

sözsüz dönəcəksən bir gün.

Deyirsən....

Əşşi, deyirsən də...

Tfu...

Şokdan ağzımda tüpürcəyim quruyub

Yoxsa tüpürərdim üzünə, sən öl!

İlk dəfə peşmanam dəvə olmadığıma

Yoxsa tüpürərdim üzünə, sən öl!

Üzündə bahalı kosmetikadan rəsm əsəri,

Şvarskopa heyfim gəlir,

Yoxsa tüpürərdim üzünə, sən öl!

Üzünə çoxları tüpürüb, mənsə fərqlilik sevirəm

Yoxsa tüpürərdim üzünə sən öl!

Hələ tanımırlar

Uzun bir şeir kimidi həyatım

Hər bənddə qocalıram

İşlənmiş kağız kimi

Yazıq-yuzuq olub

əzik-üzük baxıram

zibil qutusundan

Ağappaq vərəqlərə

Xoşbəxt, bir az da lovğa vərəqlərə

Yazıqdılar

Qələm görməyiblər hələ.

Cırıq bir çətir kimidi həyatım

Hər dəliyimdən bir az su, bir az da kədər keçir

Dəlik-dəliyəm

Dəli-dəli baxıram vitrindəki parçalara

Rahat, bir az da həsrətlə baxırlar havaya

Bədbəxtdilər

Yağışı tanımırlar hələ.

Uçuq bir koma kimidi həyatım

Hər maşın zərbəsindən düşür bir tərəfə tikəm

Tikə-tikə olub

Ürkə-ürkə baxıram maşınlarla yanımdan ötən daşlara

Səliqəli və qürurlu dayanıblar

Qorxmazdılar

İnsanı tanımırlar hələ...

• Vəsimə İsmayılqızının Zəfərimizə həsr olunmuş kitabları təqdim edildi
• Dünya şöhrətli aktyor karyerasını bitirir
• “Musiqinin cəmiyyətdə rolu” mövzusunda elmi-praktik seminar keçirildi