Ayrılığın sahilləri sevgi qoxuyur hərdən

Ayrılığın sahilləri sevgi qoxuyur hərdən
18 yanvar 2013
# 11:16

Mövsümlər tez-tez dəyişər,

Sən yaşayan şəhərdə.

Yaz ötüşər, payız düşər,

Sən yaşayan şəhərdə.

Sevənlər unudar gedər,

Arzuların satar gedər,

Bir dönüşsüz qatar gedər,

Sən yaşayan şəhərdən.

Yaşlanarıq dərd əlində,

At ilində, it ilində,

Bir dənizin sahilində,

Sən yaşayan şəhərdə.

Mən də elə sən gündəyəm,

Bu həyatın içindəyəm,

Neçə vaxtdı sürgündəyəm

Sən yaşayan şəhərdə.

Bir axşam dövran dönəcək,

Bir sabah xəbər gələcək,

Bir gün bir qərib öləcək,

Sən yaşayan şəhərdə.

***

Uzun səfərdən

özünə qayıtmış kimi

qayıtdım iztirablardan.

Gördüm ki, yenə də adamlar

gözünü yollara dikmiş.

Baxdım ki, hələ hər kəs

öz arzusunu gözləməkdə.

Anladım ki, bu həyat

hələ keçməmiş.

-Sonuncu kimdir?- deyə,

uzun bir növbəyə dayanıb,

yaşamaq istədim həyatı

yenidən...

***

Ayrılığın sahilində,

Nə vaxtdı gözləyirəm.

Səni gətirəcək gəmi,

Çoxdan batdı, bilirəm.

Bilirəm, gəlməyəcəksən,

Yığıram gözlərimi.

Sənin “gələrəm” deməyin,

“Gözləmə” demək kimi.

Mən də daha gözləmirəm,

Nə aşkar, nə gizlicə.

Ayrılığın sahilində,

Yaşayıram eləcə.

Özümə bir yer seçirəm,

Bir ev qaralayıram.

Ayrılığın sahilində,

Bir ocaq qalayıram.

Bu komada tək yaşamaq,

Yaman xoşuma gəlir.

Elə buymuş sənin mənə,

Vəd etdiyin o ömür.

Gecələr sükut dillənir,

Nəğmə oxuyur hərdən.

Ayrılığın sahilləri,

Sevgi qoxuyur hərdən.

# 3869 dəfə oxunub

Oxşar xəbərlər

"Məktəb tikdirmək istəyirsə..." - Şərurlu İsfəndiyara cavab

"Məktəb tikdirmək istəyirsə..." - Şərurlu İsfəndiyara cavab

16:18 4 aprel 2025
Pioner şeypuru və Dədə Qorqud sazı - Salam Sarvanın "tarix dərsi"

Pioner şeypuru və Dədə Qorqud sazı - Salam Sarvanın "tarix dərsi"

17:50 2 aprel 2025
"Milli Kitab 10-luğu" - "İblis"

"Milli Kitab 10-luğu" - "İblis"

21:40 25 mart 2025
Türk poeziyasında sufizmin inkişaf paradiqmaları - Nizami Cəfərov

Türk poeziyasında sufizmin inkişaf paradiqmaları - Nizami Cəfərov

17:10 24 mart 2025
Mühəndisin tamadaya çevrilməsi - Qızının qisasını alan ana kim idi?

Mühəndisin tamadaya çevrilməsi - Qızının qisasını alan ana kim idi?

12:00 24 mart 2025
Folklor və postmodern təhkiyə - Elnarə Qaragözova

Folklor və postmodern təhkiyə - Elnarə Qaragözova

15:00 23 mart 2025
# # #