Səndən yaxşı düşmən çıxar,

məndən yaxşı dost.

Sən küsməyi xoşlayırsan,

mən-barışmagı.

Sən keşişə oxşayırsan,

mən günahkara.

Sən susmağı xoşlayırsan,

mən-danışmağı.

Bu döyüş necə bitsin ki,

bu qaydalarla,

Sən vurmağı xoşlayırsan,

mən-vuruşmağı.

***

Bir axşamüstü

bir Şərq şəhərində

yoruldum qadın olmaqdan.

Çay evlərində kişilər,

Gözəllik salonlarında qadınlar

Müxtəlif mövzularda

Eyni həvəslə mırt vururlar.

Çay evinin qarşısından

Ruh kimi ötüb gedir

Gözəllik salonundan çıxan qadınlar.

İnternet kafenin qapısını

Kişi hamamına girirmiş kimi

Titrəyə-titrəyə açan qızcığazın

Üzündə çarəsizliyin şəkli.

Məhəlləyə çatıb

Əllərini ayırır sevgililər.

Yasamaldakı köhnə məhəllələr

Fəvvarələr bağından çox uzaq.

Bir axşamüstü

bir şərq şəhərində

sıxıldım qadın olmaqdan.

***

Hamı özün haqlı sanır,

Haqq isə kimsəsizdi.

Haqsızların ordusu var,

Haqlısa kimsəsizdi.

Birinə bir dost qəhətdi,

Birinə bir sevgili.

Bəlkə elə bu gen dünya

Kimsəsizlər evidi?

Elə mən də tək-tənhayam,

bu canımda – kimsəsiz.

Gedənim də kimsəsizdi,

Qalanın da kimsəsiz.

Günahkaram gedənin də,

Qalanın da yanında.

Darıxıram anamın da,

Balamın da yanında.

• Qadağan olunmuş layihə: Bakıxanovun məktəb planı nəyə görə gizlədildi?
• AKİ Oskar qazanmış filmin təqdimatını keçirib
• Bir evimiz olmadı kirayələrdən uzaq... - Əsəd Qaraqaplan