Kulis.az şair Mətləb Ağanın yeni şeirlərini təqdim edir.

***

Bu qəbirdə yatan kəs,

şəklinə oxşamırsan...

sən bir başqa ölüsən,

heç kimə oxşamırsan...

qalxıb mənim yerimdə

olmaqmı istəyirsən?..

yenə burda özünü

yormaqmı istəyirsən?..

nə işin var bizimlə,

sən orda kefini çək;

deyir ki, cənnətdəsən,

qəbrindən çıxan çiçək...

durub gedim, işim var,

elə sən də yıxıl, yat...

...sən çox yaxşı ölüsən,

salamat qal, salamat...

***

İndi niyə gəlmisən?

mən öləndə gələrdin...

üçü, beşi gələcək,

onda sən də gələrdin...

Gülümsəmə, heyifdi,

yanaqların qırışar...

boş şeydi sevgi, filan,

dəyməz bircə quruşa...

Bu qapı da küsübdü,

arxanca bağlanacaq...

ah çəkərsən: “bu adam

nə vaxt ağıllanacaq?..”

Hələ tezdi, kənar dur,

ölərsən, dirilərsən...

min il sonra burda ol,

düz vaxtında gələrsən...

***

Çox üzr istəyirəm

səndən, məni bağışla...

elə bu saniyədən,

andan, məni bağışla...

Yenə də bir arzu tut,

içində Mətləb olsun...

deyəcəyin beş sözün

üçündə Mətləb olsun...

Mənim yerim cəhənnəm,

cənnət sənindi yəqin....

min əzabla ölməsəm,

minnət sənindi yəqin.

Əlimi döy dizimə,

al, gözlərimlə ağla...

əlbəttə, bir gün səni,

gəzəcəyəm çıraqla...

mənimçün fərqi yoxdu,

bu həyatdı, demirsən?!

...bağışla, istəyirsən...

...bağışla, istəmirsən...

***

Bu gün məni unutdun,

adım düşdü dilindən...

belə də olmalıydı,

günlərin bir günündə...

ən uzaq ulduzların

necə gəlir işığı;

elə qalar yadında,

mən fağır kənd uşağı...

nə vardı aramızda,

uçurum kimi qaldı...

yazdıqların vərəqdə,

bir qurum kimi qaldı...

səninlə etdiklərim,

dönə-dönə olacaq...

...mənim kefim pis deyil,

olan sənə olacaq...

• Nailə Vəlixanlının 85 illiyi münasibətilə elektron məlumat bazası hazırlandı
• “Tomorrowland” festivalı bu dəfə hansı ölkədə keçiriləcək?
• İlahi və həyati eşqin arasında - "Məsnəvi"yə niyə "folklor ensiklopediyası" deyirlər?