Xoşladığım bir gecə, yerlər, göylər işıqlı,

Ay bir sərxoş göz kimi, ulduzlar yaraşıqlı.

Bunları seyr edərkən

Bir az fikrə gedərkən

Fikrim, hissim, xəyalım o qədər yüksəldi ki,

Mənə öylə gəldi ki,

Bizlərdən əvvəl nə yer, nə göy, nə həyat olmuş,

Nə bu ucsuz-bucaqsız gözəl kainat olmuş...

Gecə sakit... düşüncəm sakit deyildir fəqət,

Gözlərimin önündə canlandı bir həqiqət.

Xəyalım ənginlərə o qədər yüksəldi ki,

Mənə öylə gəldi ki,

İlk dəfədir kainat-

Dünyanı sellərində çalxayan bizim həyat

Sağda, solda döyüşmüş,

Sonra yoluna düşmüş.

Nə dayanmaq vaxtıdır, gözəl dostum, sən də gəl!

Seyr edəlim qol-qola bu zümrüd çəməndə gəl!

Göy üzünə bircə bax, hər ulduz bir sarı gül,

Yarı qönçə, yarı gül.

Səni gördüm, xəyalım o qədər yüksəldi ki,

Mənə öylə gəldi ki,

Bizə bu nazlı aləm görünərdi qaranlıq,

Gözəl çarpışmasaydıq, gözəl yaşamasaydıq.

Xoşladığım bir gecə, yerlər, göylər işıqlı,

Ay bir sərxoş göz kimi, ulduzlar yaraşıqlı.

Bunları seyr edərkən,

Bir az fikrə gedərkən,

Fikrim, hissim, xəyalım o qədər yüksəldi ki,

Mənə öylə gəldi ki,

Bizlərdən əvvəl nə yer, nə göy, nə həyat olmuş,

Nə bu ucsuz-bucaqsız gözəl kainat olmuş...

• Din xadimi olmaq istəyən cinayətkar - Günün filmi
• "Əyləndiyi adamları xüsusi “işgəncə” ilə öldürməkdən zövq alırdı" - Romanın ən əxlaqsız imperatoru kim idi?
• “Üzeyir Hacıbəyli və musiqi mirası” adlı konsert tədbiri keçirildi