Azərbaycan Teatr Xadimləri İttifaqında “Günay” Uşaq və Gənclər Teatrının ifasında Zərəngiz Dəmirçinin “Cavab ver” poeması əsasında hazırlanan “Xocalını unutmadıq” tamaşası təqdim edilib.

Kulis.az xəbər verir ki, tamaşanın quruluşçu rejissoru “Günay” Uşaq-Gənclər Teatrının direktoru Larisa Tarusovadır.

Tədbirin əvvəlində iştirakçılar faciə qurbanlarının xatirəsini bir dəqiqəlik sükutla yad ediblər, ardınca Dövlət Himni səsləndirilib.

Tədbiri açan Azərbaycan Teatr Xadimləri İttifaqının sədri, Xalq artisti Hacı İsmayılov Çingiz Mustafayevi dərin hörmətlə yad edib. O, jurnalistin Xocalı hadisələrinin sənədləşdirilməsi və faciə haqqında həqiqətlərin beynəlxalq ictimaiyyətə çatdırılmasına verdiyi töhfələri vurğulayıb və qeyd edib ki, Xocalı ölkəmiz üçün təkcə böyük faciə deyil, həm də cəsarət və qəhrəmanlıq tarixinin bir hissəsidir.

Poemanın müəllifi Zərəngiz Dəmirçi tamaşanın ərsəyə gəlməsində iştirak edən yaradıcı heyətin işini yüksək qiymətləndirib və quruluşçu rejissor Larisa Tarusovaya minnətdarlığını bildirib. Onun sözlərinə görə, bu mövzuda teatr tamaşaları tarixi yaddaşın qorunması, faciə qurbanlarının xatirəsinin əbədiləşdirilməsi və ictimaiyyətin həmin hadisələrə həssaslığının artırılması baxımından çox vacibdir.

Tamaşanın rejissoru Larisa Tarusova, öz növbəsində, Teatr Xadimləri İttifaqının sədri, Xalq artisti Hacı İsmayılova daimi diqqət və dəstəyə görə minnətdarlığını bildirib. O qeyd edib ki, göstərilən qayğı və diqqət yaradıcılıq prosesinə əlavə stimul verir, kollektiv üçün əhəmiyyətli mənəvi dayaq rolunu oynayır.

• Yeni Ceyms Bond kim olacaq? - Kastinq direktoru "007"nin sirrini açdı
• Qəlbimdə sübhədək oyaq qalan qız... - Ramiz Qusarçaylı
• "Sovet rejimi yəhudi beyni, çin süngüsü və rus axmaqlığı ilə qorunur" - Nağı bəy Şeyxzamanlı