Kulis.az bəzi maraqlı faktları təqdim edir.

31 saniyəlik soyğun

Keçən il 5 oğru Amerikanın Nyu-Cersi şəhərindəki “Apple” mağazasını soyaraq tarixin ən sürətli oğurluğuna imza atıblar. Bunun üçün günlərlə plan qurmağa, yaxud silahdan istifadə etməyə ehtiyac olmayıb. Soyğun üçün bir kərpic lazım olub, onunla da vitrini sındırıblar. İçəri girərək 31 saniyə ərzində 23 MacBook Pro, 14 iPhone və 9 iPod oğurlayıblar.

Cəsarət, yoxsa bəxtsizlik?

1901-ci ildə Mod Uillard adlı qadın bir pivə çəlləyinin içinə girərək Niaqara şəlaləsindən aşağı tullanıb. Özü ilə çox sevdiyi itini də götürən Uillard onlarla metr aşağı yuvarlansa da, çəllək qırılmayıb. Sonradan ətrafdakılar çəlləyi tapıb və açanda qadının öldüyünü görüblər. Onun çox sevdiyi iti isə sağ qalıb. Hamı qadının beyin qanamasından öldüyünü düşünsə də, həqiqət başqa cürmüş. Sən demə, Uillardın iti çəlləkdəki yeganə hava gələn deşiyə burnunu dirəyib və sahibəsinin nəfəs almağına mane olub. Nəticədə, Uillard hava çatışmazlığından ölüb.

“Niyə qızlar üstümə atılmır?”

Hindistanlı bir gənc 7 ildir istifadə etdiyi ətir firmasını məhkəməyə verib. Səbəb isə ətir reklamının həqiqətə uyğun olmamağı imiş. Firmanın məhsullarının reklamında qızlar həmin ətirləri vuran oğlanların üstünə atılırmış. Vaibhav Bedi adlı gənc də da reklama inanaraq, 7 ildir qızların onun üstünə atılmasını gözləyib. Nəhayət, 26 yaşında firmaya qarşı iddia qaldırıb, özü də nə az, nə çox düz 26 min funt-sterlinq (30 min AZN) dəyərində.

Bedi iddia ərizəsində yazıbmış: “Firma məni aldadıb, çünki reklamlarda bu ətri vuran oğlanların qadınları valeh etdiyi göstərilir. Mən 7 ildir bu firmanın məhsullarını işlədirəm, amma bir qız da yaxınlaşmayıb”.

Hamburgerin qısa tarixçəsi

Gənclərin, uşaqların sevimli yeməyi hamburgerin tarixi çoxumuzun zənn etdiyimiz kimi Qərb ölkələrinə deyil, Orta Asiyada yaşamış tatarlara gedib çıxırmış. Tatar türkləri çiy ətin bişəndə daha rahat həzm olunduğunu və içinə müxtəlif ədviyyatlar, soğan qatılanda daha dadlı alındığını kəşf ediblər. Beləliklə, tatar bifşteksi yaranıb. Orta Asiyaya ticarət məqsədi ilə gələn alman tacir tatar bifşteksinin dadını o qədər bəyənir ki, gələn kimi yaşadığı Hamburg şəhərində ondan hazırlamağa başlayır. Adını da “Hamburger” qoyur.

Almaniyadan sonra İngiltərədə sevilən yeməyin adı “Selsböri bifşteksi” kimi dəyişdirilir. Çünki İngiltərəyə onu həkim J.H.Selsböri gətirir və iddia edir ki, gündə 3 dəfə bu bifştekslərdən yemək sağlamlığa çox xeyirdir.

Sonradan Amerikaya köçən almanlar bifşteksin adını “hamburger” kimi saxlayıb və məşhurlaşdırıblar.

• Dünyanın ən qədim batmış gəmisi aşkar edildi
• Süni intellekt, söz azadlığı... - Beynəlxalq Frankfurt Kitab Sərgisində nələr müzakirə olundu?
• Peyğəmbər “Elm Çində də olsa, ardınca gedin” deyirdi... - Dövlətimizə qarşı radikal xor oxuyanların dərdi nədir?