Türkiyənin məşhur “İz yayınçılıq” nəşriyyatı yazıçı Vahid Məmmədlinin “Atropatena dastanı” romanını kütləvi tirajla çap edib. Əsəri Türkiyə türkcəsinə hüquq elmləri doktoru Fəthi Gədikli çevirib. Nəşr hüququ 10 il müddətinə alınmış kitab bu həftədən qardaş ölkənin oxucularına təqdim olunacaq.

Son dövrlərdə yazdığı povest və hekayələrlə dünyanın bir çox ölkələrində böyük oxucu marağına səbəb olan V. Məmmədlinin əsərləri Rusiyada, İngiltərədə, Fransada, Avstriyada, Almaniyada, Hindistanda və digər ölkələrdə çap olunub. Artıq “Atropatena dastanı” romanının digər dillərdə çap olunması üçün dünyanın bir çox tanınmış nəşriyyatları ilə müəllif arasında müqavilələr imzalanıb. Bu ilin may ayında dastanın Almaniya və Avstriyada, sentyabr ayında isə Bolqarıstan, Çexiya və Çində nəşrləri nəzərdə tutulur.

V.Məmmədli Avropanın və Rusiyanın ən böyük nəşriyyatı sayılan "Eksmo" nəşriyyatının müəlliflərindən biri olmaqla yanaşı, Rusiyada və Azərbaycanda bestsellerə çevrilən "Tunc Allahın yükü", "Cəllad tələsməyi sevmir", "Heksogenli yol yoldaşı", Azərbaycanda isə dastan janrında yazılmış ilk epik əsər "Atropatena dastanı" trilogiyasının müəllifidir.

• Sonuncu barista - Əli Novruzovun yeni hekayəsi
• Yazıçı onlardan 1 milyon dollar tələb edir
• Oqtay Mirqasıma ağır itki