Radiodakı təsadüfi cümlədən rok tarixinə... - Məşhur “Black hole sun” necə yarandı?

Radiodakı təsadüfi cümlədən rok tarixinə... - Məşhur “Black hole sun” necə yarandı?
22 noyabr 2026
# 12:28

Kulis.az "Miksteyp" rubrikasında "Black hole sun" mahnısı haqqında materialı təqdim edir.

Bəzi mahnılar yaranma anında o qədər təsadüfi görünür ki, sonradan milyonlarla insanın yaddaşında necə yer etdiyinə inanmaq çətin olur. "Soundgarden" qrupunun “Black hole sun” mahnısı da məhz belə bir yolda doğulub. Kris Kornel bu mahnını yazanda nə böyük bir hit yaradacağını düşünürdü, nə də onu illər sonra qrupun ən tanınan işi kimi görürdü. Söhbət Sietl yağışlarının altında, gündəlik həyatın xırda səsləri içində ortaya çıxan bir neçə misradan və bir gitar melodiyasından gedir.

Əhvalat çox sadə başlayır. Kornel bir gün maşın sürərkən radioda xəbər aparıcısının sözlərini yarımçıq eşidir. Səs-küylü, bir az da qırıq-qırıq gələn ifadələrdən beynində “black hole sun” birləşməsi qalır. Bu ifadənin konkret mənası yox idi, amma səslənişi ağır, qaranlıq və eyni zamanda cəlbedici idi. Evə çatanda, ya da ağlına ilk düşən anda bu sözləri bir kənara qeyd edir. O vaxtlar qrupun digər üzvləri ilə mahnı üzərində işləyərkən bu frazanın ətrafında nə qurulacağını heç kim tam bilmirdi. Hətta Kornel özü də sonralar mahnını yazarkən beynindəki sözləri çox da süzgəcdən keçirmədiyini, sadəcə ağlına gələn obrazları ard-arda düzdüyünü deyirdi.

Maraqlısı budur ki, bu mahnı "Soundgarden" qrupunun o vaxta qədər alışdığımız ağır, sərt və bir qədər qəzəbli səslənişindən fərqli idi. Qrupun əvvəlki işlərində gərginlik daha açıq görünürdü, burada isə həm ağırlıq, həm də qəribə yuxu atmosferi var. Mahnının əsas gitara xətti təkbaşına, ev şəraitində yazılıb. Kornel gitaranı əlinə alıb melodiyanı tapanda mahnının başqa bir qata keçdiyini hiss edib. Sonra qrup üzvləri bu skeletə öz nəfəslərini qatıblar, ritm ağırlaşıb, səslər dərinləşib. Heç bir planlı, böyük bəyanatla yazılmış əsər deyildi bu; daha çox axına buraxılmış bir cəhd idi.

Mahnının təhlilinə gələndə görürük ki, sözlər zahirən dağınıq görünsə də, içində aydın narahatlıq var. “Black hole sun” özü bir ziddiyyətdir. Günəş işıq və istilik deməkdir, qara dəlik isə hər şeyi udan boşluq. Bu iki anlayışın yan-yana qoyulması insanın daxilindəki yorğunluğu və ətraf aləmdəki saxtalığı göstərir. Sözlərdəki “günəş yağışı”, “əriyən gözlər” kimi ifadələr real mənzərədən çox, insanın yorğun gözlərlə dünyaya baxanda gördüyü bulanıq şəkillərə bənzəyir. Burada qəhrəmanlıq yoxdur, xilaskar da görünmür. Sadəcə baxan, eşidən və olan bitəni yadlaşmış halda izləyən bir insan var.

Musiqi ilə sözlərin uyğunluğu da bu hissi gücləndirir. Nəqərat gələndə səs açılır, melodiya genişlənir, amma bu genişlik sevinc gətirmir. Əksinə, adamın üstünə ağır səma çökürmüş kimi təsir edir. Sanki hər şey göz qabağında baş verir, amma heç nəyi dəyişmək olmur.

Bəlkə də mahnını bu qədər yaşadan elə bu təbiilikdir. Əsər hər şeyi izah etməyə çalışmır, dinləyiciyə hazır cavab vermir. Dinləyərkən hərə öz həyatının yorğunluğunu yaşayır.

# 45 dəfə oxunub

Oxşar xəbərlər

Tanınmış hind yazıçıdan "Yazmağın 10 qaydası"

Tanınmış hind yazıçıdan "Yazmağın 10 qaydası"

15:00 18 noyabr 2026
Motsartı fəth edən "Mehtər marşı", qəhvə və aypara çörək...  - Vyana türklərdən nələri öyrənmişdi?

Motsartı fəth edən "Mehtər marşı", qəhvə və aypara çörək... - Vyana türklərdən nələri öyrənmişdi?

12:00 17 noyabr 2026
“Ölsəm, məni bir-iki gün saxlayın, birdən dirildim” – Gülşən Qurbanovanın başına nələr gəlmişdi?

“Ölsəm, məni bir-iki gün saxlayın, birdən dirildim” – Gülşən Qurbanovanın başına nələr gəlmişdi?

10:00 17 noyabr 2026
Ölüm ayağında Sakit okeana qaçan yazıçı - Yerli əhalinin ona verdiyi sirli ad nə idi?

Ölüm ayağında Sakit okeana qaçan yazıçı - Yerli əhalinin ona verdiyi sirli ad nə idi?

16:00 15 noyabr 2026
"Amerika modernizminin anası"nın səhrada tapdığı sirr - "Qarğalı kanyon"

"Amerika modernizminin anası"nın səhrada tapdığı sirr - "Qarğalı kanyon"

13:45 15 noyabr 2026
Kağızlar, möhürlər və insan həyatını məhv edən sistem - İşgəncə otaqlarında nələr baş verir?

Kağızlar, möhürlər və insan həyatını məhv edən sistem - İşgəncə otaqlarında nələr baş verir?

16:00 13 noyabr 2026
#
#
Ana səhifə Reels Yazarlar Xəbərlər