19-20 noyabr 2012-ci il tarixdə AMEA Rəyasət Heyətində AMEA Folklor İnstitutunun və AMEA A.Bakıxanov adına Tarix İnstitutunun təşkilatçılığı ilə “Folklor və tariximiz” mövzusunda Respublika Elmi Konfransı keçirilib. Konfransın iki gün davam etməsi nəzərdə tutulub. Konfransda akad.T.Bünyadov, akad.N.Vəlixanlı, m.ü.K.Abdulla, m.ü.Y.Mahmudov, fil.ü.e.d.M.İmanov, fil.ü.e.d.K.Əliyev, sənət.ü.e.d.R.İmrani, fil.ü.e.d.G.Babaxanlı və b. iştirak ediblər.

Konfrans altı bölmədə təşkil olunub və hər bölməyə görkəmli folklorşünas alimlərin-Hənəfi Zeynallı, Əmin Abid, Vəli Xuluflu, Məmmədhüseyn Təhmasib, Əziz Ubaydulin və Bəhlul Behcətin adları verilib.

Konfransı giriş sözü ilə AMEA-nın Humanitar və İctimai Elmlər Bölməsinin akademik-katibi v.i.e. müxbir üzv Kamal Abdulla açaraq, bu günün əlamətdar bir gün olduğunu vurğulayıb, iki institutun bir yerdə Azərbaycanla bağlı dəyərləri təhlil edib, onu cəmiyyətin müzakirəsinə çıxarmaq səyini elmi-nöqteyi nəzərdən bölmə qarşısında duran ən maraqlı, faydalı və perspektiv bir məsələ hesab etdiyini bildirib. O, institutların daxilindəki inteqrasiyanı alqışlayıb, belə bir örnək konfransa görə Tarix İnstitutunun direktoru m.ü.Y.Mahmudova və Folklor İnstitutunun direktoru fil.ü.e.d. M.İmanova təşəkkür edib və konfransın işinə uğurlar arzulayıb.

Folklor və tarixin əlaqəsindən bəhs edən m.ü.Y.Mahmudov bu cür birgə konfransın təşkil olunması ideyasına görə təşəbbüs göstərmiş Humanitar və İctimai Elmlər Bölməsinə minnətdarlığını bildirib, real tarixin xalqın yaşatdığı folklorda, adət-ənənədə əks olunduğunu söyləyib. Milli və mənəvi mədəniyyətimizin öyrənilməsində birinci yeri tutan folkloru “etnoqrafiyanının şah damarı” adlandıran akad. T.Bünyadov da bu günü elmi bayram adlandırıb və belə tipli elmi konfransların davamlı şəkildə təşkil olunmasını məqsədəuyğun hesab edib.

Konfrans haqqında məlumat verən fil.ü.e.d. M.İmanov əsas vəzifənin elm sahələri arasında əməkdaşlığın yaranması, genişləndirilməsi, həmçinin ortaq problemlərin ortaq müstəvidə öz həllini tapmasından ibarət olduğunu qeyd etmişdir.
Qısa fasilədən sonra dos.T.Nəcəfli “Azərbaycanda Cəlalilər hərəkatı və Koroğlu”, fil.ü.f.d. M.İsmayıl “Folklorda yaşayan tarixi həqiqət: “Sarı gəlin” xalq mahnısının etnik kökləri üzərində bir dəyərləndirmə”, fil.ü.f.d.A.Cəmil “Manas:tarixi varislikdən ədəbi varisliyə”, fil.ü.f.d.Ə.Ələkbərli ““Kitabi-Dədə Qorqud”:dastanda gizlənən tarix”, fil.ü.f.d.V.İbrahimova “Aşıq Qurbaninin şeirlərində Şah İsmayıl Xətai obrazı”, G.Hasilova “Tarixi roman və folklor (Ə.Cəfərzadənin “Bakı - 1501” romanı əsasında)” mövzusunda məruzələrlə çıxış ediblər.
Məruzələrin mətni öncədən “Elm və təhsil” nəşriyyatı tərəfindən nəşr olunub.

• Naxçıvanda Əcəmi Naxçıvaninin abidəsi ucaldılır
• Gənc Yazarlar İttifaqı — Sözün gücünə inananların ünvanı
• Qəzet paylayanın dürüstlüyü - Kurt Vonnequtun hekayəsi