Elmin açıqlaya bilmədiyi faktlar

Dünyada qəribəliklər günü-gündən artmaqdadır. Elm bəzi suallara cavab tapsa da bəzilərinin qarşısında aciz qalır. ABŞ-ın “LiveScience” jurnalı bunları araşdırıb və elm dünyasının açıqlaya bilmədiyi 10 faktın siyahısını tərtib edib.

Bədən və beyin bağlantısı
Beyinlə bədən arasındakı sıx bağlantıdan söz düşəndə, yaxud ağır xəstələr haqqında danışanda mütləq “Plasebo effekti” xatırlanır. “Plasebo effekti” – xəstənin öz-özünü fikrən sağaltmasıdır. Sübut olunub ki, insan saxta, lazımsız bir dərman atmaqla da ağır bir xəstəlikdən qurtula bilər, yetər ki ona fikrən inansın. Plasebo sınaqları beyin nəyə inanırsa, bədənin də onu yaşadığının sübutudur. Əksər həkimlər beynin köməyi ilə bədəni yaxşılaşdırma qabiliyyətinin, modern tibbin yarada biləcəyi bir möcüzədən qat-qat təsirli olduğuna inanır.

Ruhlar

Ruhların varlığı haqqında ciddi bir sübut olmasa da, onları görən, onlarla söhbət edən, şəkillərini çəkən bir çox insanlar, şahidlər var. Ancaq elm hələ də bunu açıqlaya bilmir.

“Déjà vu”

Fransız sözü olan “déjà vu” “daha əvvəl görülmüş” mənasını verir. Yəni elə anlar olur ki, bunu daha əvvəl yaşadığını düşünürsən. Hamının tez-tez qarşılaşdığı hadisə, bir az təəccüblü, bir az çaşdırıcı anlardır. Araşdırmaçılar bəzi tədqiqatlar aparsalar da, “déjà vu”nun səbəbi hələ də gizlidir.

Taos uğultusu

ABŞ-ın Nyu Mexiko əyalətində yerləşən balaca Taos kəndini ziyarət edən bəzi turistlər və vətəndaşlar illərdir havadan gizli, aşağı tezlikli bir uğultu və titrəyiş eşidirlər. Bəziləri bunu uğursuzluq, bəziləri də təbiət hadisəsi kimi yozur. Ancaq hələ də elmi cəhətdən uğultunun mənbəyi, səbəbi tapılmayıb.

Altıncı hiss, yoxsa psixi güc?

Həm Qərb, həm də Şərq cəmiyyətlərində bəzi insanların altıncı hissinin olduğuna inanırlar. Belə bir gücə sahib olduqlarını iddia edənlər psixoloqlar, tədqiqatçılar tərəfindən dəfələrlə sınağa çəkilib. Amma əldə olunan nəticələr müəmmalı və şübhəli olur. Altıncı hiss məsələsi hələ də gizli qalır.

Uzaqgörənlik

Psixoloqlar bunu belə açıqlayır: insanlar şüuraltı, özləri də hiss etmədən ətrafdakılar haqqında məlumata sahib olurlar. Deməli, əslində “görünüşcə bilmədiyimiz” bəzi şeyləri bilirik, ya da hiss edirik. Ancaq bu məlumatlar şüuraltında yaşadığı üçün bunun necə baş verdiyini heç cür anlamırıq. Bu açıqlama bəziləri üçün qaneedici olsa da, bəziləri üçün hələ də üzərində işləniləsi uzun və ağır mövzudur.

Ölümdən sonra həyat

Ölümə bənzər halla rastlaşanlar çox vaxt eyni hekayəni danışırlar: “Qaranlıq tuneldə gedirdim, axrında da işıq vardı…”. Təəssüf ki, başqa heç bir sübut, yaxud inkaredilməz məlumatlar olmur. Əslində, psixoloqlar bunun “o biri dünya” deyil, travma almış beynin hallüsinasiyaları hesab edirlər. Hələ ki o dünyadan gedib qayıdan olmadığına görə, bu hekayətlər izahsız, izahlar sübutsuz qalacaq.

UNO-lar

UNO- yəni uçan naməlum obyekt deyəndə adamın ağlına dairələr, boşqaba bənzər gəmilər gəlir. Dünyanın müxtəlif ölkələrində onları görənlər var. Ancaq bu obyekt və işıqlar əslində nədir; təyyarəmi, meteoridmi, yoxsa yad planetlilərmi, onu heç kim bilmir.

İtkin düşənlər

İnsanlar bəzən itirlər. Bəziləri yaşadıqları həyatdan qaçır, bəziləri təsadüfi qəzalarda həyatını itirir, bəziləri cinayətə qurban gedirlər. Hərdən diri, çox vaxt da ölü tapılırlar. Bəziləri isə elə bil göyə çəkilirlər. 1872-ci ildə Portoqaliya yaxınlığında tapılan “ruh gəmisi”ndəki Mari Selestenin heyətinin, amerikalı, həmkarlar ittifaqı rəhbəri Cimmi Hoffanın yoxa çıxması bu cür “göyə çəkilmələr”dəndir.

“Böyük ayaq”lar

ABŞ-da tüklü, çox iri, “Böyük ayaq” adlı məxluq görən çoxlu sayda insan var. Onların dediklərinə inansaq, insana bənzəyən “Böyük ayaq”lardan minlərlədir. Ancaq indiyədək bu qorxunc məxluqun bir cəsədi belə tapılmayıb. Ancaq şəkillər, videolar və şahidlər var. Görünür, “Böyük ayaq” da Şotlandiyanın varlığı sübut olunmayan Lok Ness canavarı kimi sirlər dünyasında yerini qoruyacaq.

Hazırladı: Rena Nevzat

• Puqaçovadan haqlarında çıxan iddialara cavab
• "REZİDENS de MAREŞO"da - Sabir Əhmədlinin hekayəsi
• "Qorxuram ki, o da ərə gedəndən sonra..." - Qadınlar niyə yaza bilmir?