Almaniyada "Langenscheidt" nəşriyyatının ənənəvi olaraq təşkil etdiyi "İlin gənclik sözü" (Jugendwort des Jahres) müsabiqəsində 2026-cı ilin favoritləri açıqlanıb.

Kulis.az xəbər verir ki, həftələr boyu 11-20 yaş arası gənclərin səsverməsi nəticəsində "Crashout", "Ragebait" və "Peak" sözləri ilk üçlüyə daxil olub və ümumilikdə yüz minlərlə səs toplayıb.

Qalib söz şənbə günü Frankfurt Kitab Sərgisində elan ediləcək. Builki siyahıda ingilis mənşəli ifadələrin mütləq dominantlığı diqqət çəkir.

Favorit üçlük gənclərin dilində hansı mənaya gəlir?

Nəşriyyatın münsiflər heyəti ən çox səs toplayan (ümumi səslərin 43 faizi) ilk üçlüyün mənalarını belə izah edir:

• Crashout: Kiminsə idarəetməni itirməsi, çılğınlaşması və ya emosional partlayış yaşaması deməkdir. Əksər hallarda həqiqi qəzəbi deyil, kiçik bir səbəbə verilən şişirdilmiş emosional reaksiyaları ironik şəkildə ifadə etmək üçün istifadə olunur.

• Ragebait: Sosial mediada qəsdən qəzəb və reaksiya doğurmaq üçün hazırlanan məzmunları (provokativ şərhlər, yalan iddialar, absurd fikirlər) ifadə edir. "TikTok" və "İnstaqram" kimi platformalarda reaksiya "valyuta" rolunu oynadığı üçün, alqoritmlər bu cür manipulyativ məzmunları daha çox önə çıxarır.

• Peak: İngiliscədə "zirvə" mənasına gələn bu söz gənclərin dilində ən yüksək səviyyəni anlatmaq üçün istifadə edilir. Bir şey "Peak"dirsə, bu, onun ən yaxşının da ən yaxşısı, mütləq zirvə və ya qısaca "10/10" olduğunu göstərir.

Türkcə "Süper" sözü və kənarlaşdırılan qalmaqallı ifadə

İlk onluğa həmçinin "TikTok" və rep trendi sayəsində populyarlaşan "67", səsvermələrdə daim iştirak edən, lakin heç vaxt qalib olmayan klassik "Digga", oyun dünyasından gələn və "mənim səhvimdir" mənasını verən "Schere", eləcə də "Macker" (sevgili/kanka) və "Gute Käse" (çox yaxşı/sağlam) kimi ifadələr daxil olub. Diqqətçəkən məqamlardan biri isə türkcə "Süper" sözünün Almaniyada ilk onluqda yer almasıdır. Bu söz bir ultramarafon qaçışçısının müsahibəsi zamanı verdiyi qısa və yorğun "Süper" cavabından sonra məşhurlaşıb.

Münsiflər heyəti bu il xeyli səs toplayan "Mehrzweckeier" sözünü isə yarışmadan kənarlaşdırıb. Hərbi xidmətin bərpasına qarşı etiraz aksiyasında yaranan və əslində bir siyasətçiyə qarşı təhqirə əsaslanan (orijinalda "Merz leck Eier") bu söz sonradan "Reddit" platformasındakı kampaniya nəticəsində formalaşdırılmışdı. Nəşriyyat sözün həm süni kampaniya məhsulu olması, həm də şəxsi təhqir ehtiva etməsi səbəbindən reqlamentə zidd olduğunu açıqlayıb.

"İlin gənclik sözü": Z nəsli və sosial medianın dilə təsiri

"Langenscheidt" lüğət nəşriyyatı 2008-ci ildən etibarən hər il gənclərin dilini və trendlərini əks etdirən "İlin gənclik sözü"nü seçir. Bu seçimlər müasir gəncliyin cəmiyyətə, texnologiyaya və əyləncəyə baxış bucağının ən dəqiq indikatorlarından biri hesab olunur. İlk qalib 30 yaşdan yuxarı şəxslərin partiyalarını lağa qoyan "Gammelfleischparty" (Köhnəlmiş ət partiyası) sözü olmuşdu. Sonrakı illərdə isə "Yolo" (you only live once) və "Swag" kimi qlobal sözlər bu ada layiq görülüb. 2026-cı ilin səsverməsi bir daha sübut edir ki, gənclərin gündəlik leksikonu artıq klassik küçə jarqonundan daha çox qlobal internet mədəniyyəti, kiber-slenq və xüsusilə "TikTok" alqoritmləri tərəfindən formalaşır. Almaniyada seçilən sözlərin əksəriyyətinin ingilis mənşəli olması da qloballaşmanın yerli dillərə təsirinin əyani sübutudur.

Ülvi Bahadır

• Dünya kinosunun "Anna Karenina"sı - Qreta Qarbonun məşhur rolları
• Xarici diplomatlar Xudavəng monastr kompleksini ziyarət etdi
• AYB: "Üzvlük haqqını ödəməyən şəxslər birlikdən xaric ediləcək"