Bu gün Xalq şairi Qabilin doğum günüdür. Kulis.az "Günün şeiri" layihəsindən onun “Səhv düşəndə yerimiz” şeirini təqdim edir.
Duman dağı dolanar,
Qiyamət olar.
Duman yola sallanar,
Müsibət olar.
Müsibət oluruq biz,
Səhv düşəndə yerimiz.
Ümman gəmisi çayda
Oturar, üzməz!
Çay gəmisi, dağ boyda
Dalğaya dözməz!
Dözümsüz oluruq biz,
Səhv düşəndə yerimiz.
Muğan həsrət yağışa,
Buludlar xəsis...
Yağış tökür talışa
Hey-hey gərəksiz...
Gərəksiz oluruq biz,
Səhv düşəndə yerimiz.
Küt bıçaq parıldayıb
Xırçıltı salıb.
Qılınc qında pas atıb
Qında korşalıb...
Heyf... korşalırıq biz,
Səhv düşəndə yerimiz.
Ağ biləklər gül əllər
Tarlada qabar.
Bir qeyrətsiz yekəpər
Qızıl gül satar.
Qeyrətsiz oluruq biz,
Səhv düşəndə yerimiz.
Tarın pərdələrini
Düzənə qurban!
Yerdəyiş et birini,
Xaric vurarsan.
Xaric səslənirik biz,
Səhv düşəndə yerimiz.
1969
Səhv düşəndə yerimiz - Günün şeiri

Oxşar xəbərlər

Sevməyin, ay əclaflar, bizi gözləyən qadınları... - Zahir Əzəmətin şeirləri
14:08
25 aprel 2025

Yalanmış azadlıqdan dəm vurmağım... - İlham Qəhrəmanın şeirləri
13:44
24 aprel 2025

“Mənə sığınacaq ver, ey yeganə tanış sərhəd! - Söhrab Sipehrinin şeirləri
14:55
21 aprel 2025

Bir qara gözəlin mavi göz yaşı – Xəyal Rzanın şeirləri
18:00
17 aprel 2025

Səhv düşəndə yerimiz - Qabil
15:02
16 aprel 2025

Sərxoş gəlmişəm qapına - Şaiq Vəli
14:12
16 aprel 2025