"Yeşilçam"da 500-dən çox filmdə rol alan 80 yaşlı aktyor Coşkun Göğen Selen Görgüzelin yutubda yayımlanan proqramına qonaq olub və illərdir maraq doğuran bir suala aydınlıq gətirib.

Kulis.az xəbər verir ki, bərbər işləyərkən təsadüfən filmlərdə oynamağa başladığını deyən aktyor bu gün də gördüyü işlərin hamısının arxasında dayandığını bildirib:

“65 ildir nə etmişəmsə, hamısının arxasındayam. Aktyor olmamışdan əvvəl adam olmaq lazımdır”.

Serial təkliflərini niyə qəbul etmədiyi haqqında danışan sənətçi bu qərarı ailəsinə görə verdiyini deyib:

“Əvvəllər həyat yoldaşım evdə tək qalmasın deyə istəmədim. İndi də Antalyada yaşayıram, uzun müddət çəkiliş meydançalarında ola bilmirəm”.

Xatirələrini də bölüşən Coşkun Göğen Kemal Sunalla işləməyin asan olmadığını gizlətməyib:

“Kemal Sunal çox rahat oynayırdı, səhnəni yerindəcə yaradırdı. Bir də görürdün, qarşısındakının üzünə doğrudan şillə vurur.”

Kadir İnanır haqqında isə başqa cür danışıb:

“Hər şeyin ən yaxşısını edirdi, çox peşəkar idi. Bizə də tez-tez əsəbiləşirdi”.

"Yeşilçam"ın unudulmaz aktrisalarını da xatırlayan aktyor Fatma Girik üçün “mükəmməl insan idi” deyib və maraqlı bir xatirə danışıb:

“‘Kaçak’ filmini çəkəndə şalvarım cırıldı, oturub özü tikdi”.

“Ən gözəl aktrisa kim idi?” sualına isə tərəddüdsüz cavab verib:

“Mənə görə ən gözəli və ən nəzakətlisi Necla Nazır idi. Ona sonsuz hörmətim var.”

Hətta “Batan güneş” filmində Necla Nazırın başında qab sındırdığı səhnədə başının qanadığını, amma çəkilişi yarımçıq saxlamadıqlarını da əlavə edib.

2024-cü ildə həyat yoldaşı Anjelika Göğeni itirən aktyor bu itkini ağır yaşadığını qeyd edib.

Göğen bildirib ki, həyat yoldaşı valideynlərinə baxmaq üçün Moskvaya getmişdi. Elə orada da vəfat edib.

• "Xalq düşmənlərini" xilas edən prokurorun həbsindəki erməni izi - Ruhulla Axundovun ölümə yolladığı şuşalı bəy oğlu kimdir?
• Eldost Bayram: "Özəl televiziyalarda başqa şey tələb edəcəkdilər..." - Müsahibə
• “Sözün varsa, de!” filminin çəkilişləri davam edir