“AB ART” nəşriyyatı Macarıstanda Azərbaycan Yazıçılar Birliyinin Mətbuat xidmətinin rəhbəri, şair Xəyal Rzanın şeirlər toplusunu nəşr edib.

Kulis.az xəbər verir ki, 1995-ci ildə yaradılan “AB ART” nəşriyyatı əsasən Slovakiya, Macarıstan və Rumıniyadan olan müasir macardilli müəlliflərin bədii ədəbiyyat əsərlərinin nəşri üzrə ixtisaslaşıb.

Qeyd olunub ki, nəşriyyat artıq on ildən çoxdur dünya poeziyası seriyasını təqdim edir. Bu seriyanın əlli doqquzuncu cildi məhz Xəyal Rzanın şeirlərindən ibarət seçməni əhatə edir.

Müasir poeziyanın müxtəlif dillərdə yazan görkəmli nümayəndələrini bir araya gətirən bu seriya indiyədək italyan, alban, fransız, keniyalı, cənubi koreyalı, çinli, rumın, serb, alman və amerikalı şairlərin əsərlərini macar dilinə qazandırıb.

Bildirilib ki, dünya ədəbiyyatı seriyasının redaktorları beynəlxalq səviyyədə tanınan macar şairləri Attila F. Balazs, Sandor Halmosi və Daniel Levente Paldır. Xəyal Rzanın şeirləri də macar dilinə Daniel Levente Pal tərəfindən tərcümə olunub.

Topluya daxil edilən tərcüməçi qeydlərində Daniel Levente Pal bildirib ki, Xəyal Rzanın şeirləri macar dilində sadəlik, birbaşa ifadə və daxili melodik ahəng tələb edir. Tərcüməçi qeyd edib ki, Xəyal Rzanın poeziyasında diqqət çəkən əsas xüsusiyyət motivlərin təkrar-təkrar qayıtmasıdır. Onun sözlərinə görə, qapı, yağış, ürək, torpaq, kədər və ölüm kimi obrazlar hər dəfə daha dərin məna qazanaraq inkişaf edir. Məsələn, əvvəl qapı daxili bağlılığı ifadə etdiyi halda, kitabın sonunda insan taleyinin simvoluna çevrilir.

• “XX əsr Azərbaycan ədəbiyyatının görkəmli siması Səməd Vurğun” mövzusunda tədbir keçirildi
• Xalça Muzeyində növbəti sərgi - “Yaddaşa həkk olunan təsvir”
• Çində itmiş qədim krallığın paytaxtı aşkarlandı