"Döyüşə qızlar gedir" filmi təqdim olunub

"Döyüşə qızlar gedir" filmi təqdim olunub
2 may 2019
# 10:15

"Azərkitab" Kitab Təbliğatı Mərkəzində tanınmış yazıçı-publisist Zemfira Məhərrəmlinin Qarabağ mövzusunda kitablarının motivləri əsasında çəkilmiş "Döyüşə qızlar gedir" filminin təqdimatı keçirilib.

"Aranfilm" Yaradıcılıq Mərkəzinin istehsalı olan bu sənədli filmin ssenari müəllifi Zemfira Məhərrəmli, bədii rəhbəri, rejissor Tahir Əliyev, rejissor-operatoru Əminə Həsənli, prodüseri Qənirə Qurbanlıdır.

Filmin qəhrəmanları - Qarabağ müharibəsinin odundan-alovundan keçmiş Xanımzər Həsənova, Aliyə Piriyeva, Kəmalə Qəhrəmanovadır.

Sənədli filmdə qəhrəmanların tarixən Azərbaycan qadınına xas olan məziyyətləri - cəsurluq, ismətlilik, yenilməzlik və Vətənə sədaqət öz əksini tapıb.

“Döyüşə qızlar gedir" filmində qızların ürəklərində qalan arzularından, dodaqlarında donan sevinclərindən, düşmən gülləsinə hədəf olan xəyallarından bəhs olunur. Qadını əsgərə çevirən Qarabağ müharibəsinin acı həqiqətləri, dəhşətləri göstərilir.

Təqdimatda çıxış edən Azərbaycan Yazıçılar Birliyinin hərbi vətənpərvərlik komissiyasının sədri Şahin Musaoğlu diqqətə çatdırıb ki, hər bir xalqın tarixində onun qan yaddaşına çevrilən dərdləri, yaraları olur. Qarabağ xalqımızın qan yaddaşıdır: “Biz imkan verməməliyik ki, gələcək nəsillərimiz bunu unutsunlar. Qarabağ dərdimizin gənclərimizə çatdırılmasında yazarların, publisistlərin, rejissorların, ümumilikdə yaradıcı insanların üzərinə böyük məsuliyyət düşür. Mən inanıram ki, qəhrəman qızlarımızın təbliğ olunmasında təqdimatını etdiyimiz bu film önəmli rol oynayacaq”.

Milli Məclisin deputatı Qənirə Paşayeva belə filmlərin çəkilməsini təqdirəlayiq hal kimi qiymətləndirdi. Bildirdi ki, biz qəhrəman, qazi oğullarımızı təbliğ edirik, bu, belə də olmalıdır. Ancaq unutmamalıyıq ki, Vətən darda olanda istər arxa, istərsə də ön cəbhədə oğullarımızla çiyin-çiyinə döyüşən qızlarımız da vardı.

Deputat qeyd etdi ki, hələ Qarabağ yaramız sağalmayıb, gənclərimizin vətənpərvərlik ruhunda böyüməsi oğullarımızla yanaşı, qızlarımızın da qəhrəmanlıqları təbliğ olunmalıdır.

Filmin ideya və ssenari müəllifi Zemfira Məhərrəmli filmin ərsəyə gəlməsində əməyi keçənlərə təşəkkür edib. O, savaş meydanında odun-alovun caynağından dirigözlü keçmiş, cəbhə bölgələrində neçə-neçə Vətən övladına arxa-dayaq olmuş, əsgərlərin həyatını xilas etmiş döyüşçü qızlarımızın ən yüksək hörmətə, ehtirama layiq olduğunu vurğulayıb. Zemfira Məhərrəmli yaradıcılığında Qarabağ mövzusunun qırmızı xətlə keçdiyini, bu mövzunun onun üçün xüsusi əhəmiyyətə malik olduğunu diqqətə çatdırıb. /azertag.az/

# 2596 dəfə oxunub

Oxşar xəbərlər

3 yaşlı qardaşını 6 yaşlı qardaşına tapşırdı - KimsəBizlər

3 yaşlı qardaşını 6 yaşlı qardaşına tapşırdı - KimsəBizlər

16:28 26 aprel 2025
Əli Mirəliyev reanimasiyaya yerləşdirildi

Əli Mirəliyev reanimasiyaya yerləşdirildi

14:34 26 aprel 2025
Napoleonun şəxsi qılıncı hərraca çıxarıldı - FOTO

Napoleonun şəxsi qılıncı hərraca çıxarıldı - FOTO

13:00 26 aprel 2025
Britaniya şahzadəsini zorlamada ittiham edən qadın özünü öldürdü

Britaniya şahzadəsini zorlamada ittiham edən qadın özünü öldürdü

11:41 26 aprel 2025
Azərbaycanlıları öldürən m*rc oyunları – Bu “killeri” kimlər göndərib?

Azərbaycanlıları öldürən m*rc oyunları – Bu “killeri” kimlər göndərib?

11:00 26 aprel 2025
Azərbaycan milli mətbuatının 150 illik yubileyi keçiriləcək - Sərəncam

Azərbaycan milli mətbuatının 150 illik yubileyi keçiriləcək - Sərəncam

17:49 25 aprel 2025
# # #