Şuşada görkəmli yazıçı və ictimai xadim Yusif Vəzir Çəmənzəminliyə həsr olunan "Millət fədaisi: Yusif Vəzir Çəmənzəminli irsinin izində" adlı kitabın təqdimat mərasimi keçirilib.
Kulis.az APA-nın Qarabağ bürosuna istinadən xəbər verir ki, kitabın tərtibçisi, filologiya üzrə fəlsəfə doktoru, dosent Şəlalə Ana Hümmətli bildirib ki, nəşrdə Çəmənzəminliyə dair müxtəlif məxəzlərdə son vaxtlar aşkar edilmiş bir sıra materiallar ilk dəfə ictimaiyyətə təqdim olunur.
Yazıçının nəvəsi, professor Leyla Vəzirova çıxışında qeyd edib ki, Yusif Vəzir Çəmənzəminlinin irsi indiyədək tam şəkildə nəşr olunmayıb və külliyatının təxminən yarısı hələ də işıq üzü görməyib.
Onun sözlərinə görə, xarici ölkələrin arxiv və kitabxanalarında, eləcə də şəxsi fondunda saxlanılan materialların toplanaraq çoxcildlik şəklində nəşri mühüm əhəmiyyət daşıyır.
Professor Firudin Qurbansoy isə araşdırmalar nəticəsində Çəmənzəminlinin "Qədim kitab", "Məhərrəm" romanlarını və "1905-ci il" adlı uşaq pyesini yazdığının müəyyən edildiyini, lakin həmin əsərlərin hələ də tapılmadığını bildirib. O, həmçinin yazıçının "Tərtər" adlı roman üzərində də işlədiyinin məlum olduğunu diqqətə çatdırıb.
Tədbirdə çıxış edən alim və tədqiqatçılar Çəmənzəminlinin milli dövlətçilik ideyaları, ana dilinin qorunması, folklorşünaslıq və maarifçilik sahəsindəki xidmətlərindən danışıblar.
Təqdimatdan əvvəl iştirakçılar Yusif Vəzir Çəmənzəminlinin Şuşadakı evinin qalıqlarını ziyarət ediblər.
Qeyd edək ki, "Millət fədaisi: Yusif Vəzir Çəmənzəminli irsinin izində" kitabı QHT-lərə Dövlət Dəstəyi Agentliyinin maliyyə dəstəyi ilə "Məxəz" Milli İrs Araşdırmaları İctimai Birliyi tərəfindən nəşr olunub.
Bizi Telegram-da izləyin
t.me/kulis_az
Bizi Instagram-da izləyin
Bizi TikTok-da izləyin
Bizi Facebook-da izləyin
Bizi X-da izləyin
