Kulis.az Firuz Mustafanın "Prezident və stüardessa" yazısını təqdim edir.

Sovet-rus xüsusi xidmət orqanları, adətən, xarici ölkələrin diplomatik korpuslarını nəzarət altında saxlayırdılar. Onların ən ümdə vəzifələrindən biri də diplomatları min bir hiylə ilə ələ keçirməkdən ibarət idi. Həm də təkcə diplomatları yox, əcnəbi turistləti, qastrolçuları, alimləri, hətta dövlət başçılarını belə, “fakt qarşısında” qoymaq SSRİ “KQB”sinin nailiyyəti hesab olunurdu. Bunun üçün ən çox gözəl xanımlardan, tanınmış aktrisalardan istifadə edirdilər. Bu cür qadınlara həmin qurumda “lastoçka” deyirdilər.

İndoneziyanın ilk Prezidenti Sukarno öz ölkəsinin Holland istismarından azad olunmasında böyük fədakarlıq göstərmişdi. Sukarno istedadlı adam idi, öz ana dilindən başqa altı dili mükəmməl bilirdi (yapon, ərəb, ingilis, Holland, alman, fransız dillərini). Yəni bu yeddi dildə danışarkən ona çox vaxt tərcüməçi gərək olmurdu. Amma ölkəsinin ilk Prezidenti sonralar xalqın təzyiqi nəticəsində istefa vermiş, ömrünün axırınacan ev dustağı olmuşdur. Bu, artıq başqa söhbətin mövzusudur.

Sukarnonun “zəif” cəhətlərindən biri zərif cinsə xüsusi rəğbətinin olması idi. O, rəsmən yeddi dəfə evlənmişdi. Əslində qadınlar da ona laqeyd deyildi. Hakimiyyətdə sərt olan bu adam qadınlara qarşı diqqətli idi. O, öləndən sonra onun xanımları ayrı-ayrılıqda xatirələrini yazıb nəşr etdirmişlər. Bu da başqa bir söhbətin mövzusudur.

Söhbər şanlı sovet kəşfiyyatından gedir. Bəli, cənab Sukarno bir dəfə Moskvaya rəsmi səfərə gələrkən təyyarədə rus stüardessası ilə tanış olur. Yeddi dil bilən, yeddi dəfə evlənmiş və gözəlliyə biganə olmayan qoçaq Sukarto qızın telefonunu alır və onu yaşadığı hotelə dəvət edir. Sən demə bu ucaboy, gülərüz, şən stüardessa qız “orqanların” təcrübəli “lastoşkası” imiş.

Prezident və xanım qız görüşürlər… Ayıq-sayıq “orqan” işçiləri lentə aldıqları yataq səhnəsini Sukarnoya göstərirlər. Prezident “filmə” sonacan diqqət və maraqla tamaşa edir. “Orqan” işçiləri onun reaksiyasını gözləyirlər. Çünki adətən belə “səhnələrdən” sonra “obyekt” özünü itirir, vəziyyətdən çıxmaq üçün müəyyən təkliflərlə üzləşir.

Təcrübəli Sukarno gülümsəyərək məlum xidmət orqanının işçilərinə təşəkkür edir və deyir: “Xahiş edirəm o lentin sayını artırıb mənə verin. Mən özüm onu ölkəmizin televiziyasında nümayiş etdirəcəm. Qoy mənim xalqım görsün ki, ona necə cəsur və enerjili bir kişi rəhbərlik edir”.
Beləliklə, Prezidentə qarşı hazırlanmış “plan” alt-üst olur, qarayaxma “kampaniyası” ifşa edilir.

• Soyuq mərmər, dəfn sükutu, daşlaşmış kədər... - Andrea Mantenyanın "Ölü Məsihə ağı"sı
• Azərbaycan “Ən yaxşı mətbəx” nominasiyasında Daşkənddə mükafatlandırıldı
• "Heç nə sübut olunmayıbsa, hər şeyə icazə verilir..." - Teodor Drayzerdən sitatlar