27 avqust yazıçı-dramaturq Seyfəddin Dağlının doğum günüdür.

Kulis.az bu münasibətlə ədibin həyatı və yaradıcılğından maraqlı faktları təqdim edir.

Seyfəddin Dağlı (Seyfəddin Əliağa oğlu Abbasov) 1921-ci il avqustun 27-də Azərbaycanın Xızı rayonunda dünyaya gəlib.

O, ədəbiyyata məktəb illərində qədəm qoyub, ilk qələm təcrübələrini şeir və satirik hekayələrlə sınayıb.

Texnikumda təhsil alarkən "Kommunist" qəzeti ilə əməkdaşlıq edib, burada ədəbi işçi, şöbə müdiri və məsul katib kimi çalışıb.

İkinci Dünya müharibəsi başlayanda hərbi xidmətə çağırılıb və on beş ilə yaxın həyatını ordu sıralarında keçirib. "Ordu" qəzetində ədəbi işçi kimi fəaliyyət göstərib, sonradan "Diviziya" qəzetinə redaktorluq edib.

1944-1946-cı illərdə isə İran ərazisində Sovet qoşunları tərkibində xidmət aparıb.

Jurnalistikaya 1938-ci ildən maraqlı felyetonları ilə daxil olub. İlk kitabı “Dəniz kəşfiyyatçısı” 1948-ci ildə çap olunub və oxucuların rəğbətini qazanıb.

Müharibə illərində onun felyeton və satirik hekayələri "Vətən uğrunda", "Ədəbiyyat" və Təbrizdə nəşr edilən "Vətən yolunda" qəzetlərində işıq üzü görüb.

1952-1956-cı illərdə Lenin adına Moskva Hərbi-Siyasi Akademiyasının redaktorluq fakültəsində təhsil alıb. 1956-cı ildə akademiyanı bitirib və ordudan tərxis olunub, doğma Bakıya qayıdıb. Burada həm jurnalist, həm də yazıçı kimi fəaliyyətini davam etdirib.

1956-1959-cu illərdə Dövlət Radio Komitəsində baş redaktor vəzifəsində çalışıb, sonra isə Bakı televiziya studiyasında baş redaktor və sədr müavini olub.

Yazıçı bənzərsiz üslubu ilə həmkarları arasında seçilib. Onun yaradıcılığı zəngin və çoxşaxəli olub. Müəllif bir çox hekayə, oçerk, povest və romanlar qələmə alıb.

"Adı sənin, dadı mənim", "Aydınlığa doğru", "Mənziliniz mübarək", "Təzə gəlin", "Kölgələr pıçıldaşır", "Bahar oğlu" (Cəfər Cabbarlının həyatına həsr olunub), "Məşəl", "Kəcil qapısı", "Sabiqlər" kimi əsərləri yazıb və oxucu rəğbəti qazanıb.

O, xüsusilə satirik-yumoristik janra üstünlük verib və bu sahədə Azərbaycan ədəbiyyatının görkəmli nümayəndələrindən biri kimi tanınıb. Pyesləri ölkə teatrlarında dəfələrlə səhnələşdirilib.

Seyfəddin Dağlı həm satira, həm də yumorla yazılmış povest və hekayələrin ustası kimi tanınıb.

Onun əsərləri oxucuda düşündürücü gülüş yaradıb, sadə və rəngarəng dili ilə yadda qalıb. Əsərlərində əsas tənqid hədəfi dövrün sosial qüsurları olub, qəhrəmanlarını isə birbaşa həyatdan götürüb. Yaratdığı obrazların hər birinə fərdi bədii xüsusiyyətlər verib.

Yazıçının yaradıcılığında ən mühüm dövr "Kirpi" satirik jurnalına rəhbərlik etdiyi illər hesab olunub. 1959-1976-cı illər arasında bu jurnalın baş redaktoru kimi çalışıb.

Seyfəddin Dağlı 1983-cü il yanvarın 18-də dünyasını dəyişib.

• Azərbaycanın Montrö festivalında iştirakı caz proqramı ilə yekunlaşdı
• "İnsanın əzəməti təfəkküründə deyil, nəğməsində gizlənir..." - Fransua Moriakdan sitatlar
• Tanınmış aktrisa həbs edildi - Fələstinə dəstək aksiyasında iştirakına görə