Oskar mükafatlı rejissor Martin Skorseze kinoda süni intellektdən istifadəyə dəstək verən Hollivud simaları sırasına daxil olub.

Kulis.az xəbər verir ki, məşhur sənətkar süni intellekt şirkəti olan "Black Forest Labs"a məsləhətçi qismində qoşulub.

"The Variety" nəşrində yer alan xəbərə görə, "Black Forest Labs"ın internet saytında yayımlanan açıqlamasında rejissor bu cür fikir səsləndirib:

"Kino gənc bir sahədir; cəmi 125 illik bir keçmişi var. Bu səbəbdən onun necə təkamül edə biləcəyinə açıq olmalıyıq".

Skorseze həmçinin yeni texnologiyanın imkanlarından necə bəhrələndiyini əlavə edib:

"Mən "Hüqo" filmində 3D texnologiyasından, "İrlandiyalı" filmində isə gəncləşdirmə texnologiyasından istifadə etdim. İndi bu alət sayəsində zehnimdə canlandırdıqlarımı yaradıcı komandamla, yəni quruluşçu rəssam və operator ilə daha aydın və səmərəli şəkildə bölüşə bilirəm. Onlar da bunun üzərində işləyərək kinematoqrafik zəkanı zənginləşdirə bilirlər".

Tərəfdaşlıq elanını müşayiət edən və Skorsezenin Nyu-Yorkdakı ofisində çəkilən videoda "Yaxşı dostlar" filminin rejissoru bir səhnənin storibordunu hazırlamağa kömək etməsi üçün şirkətin "FLUX" adlı generativ süni intellekt modelindən istifadə edir.

Skorseze daha sonra məşhur kriminal filmin unudulmaz "Steadicam" planının necə səhnələşdirildiyini izah edir. Sözügedən səhnədə kamera qanqster Henri Hilli "Copacabana" gecə klubunda irəliləyərkən izləyir. Rejissor səhnədəki hər bir "vinyet"i dəqiqliklə qurmağın vacibliyini qeyd edərək videoda bildirir:

"Belə bir alətiniz varsa, bunu daha sürətli həll edə, istehsalat vaxtına qənaət edə və komandanın üzərindəki yükü azalda bilərsiniz".

Kino tarixinin ən uğurlu rejissorlarından hesab edilən Skorseze bu addımı ilə süni intellekti fərqli səviyyələrdə mənimsəyən Oskar mükafatlı həmkarlarının sırasına qatılıb. Belə ki, "Avatar" filminin rejissoru Ceyms Kameron mətndən təsvir yaradan "Stable Diffusion" modelinin tərtibatçısı olan "Stability AI" şirkətinin idarə heyətində yer alır.

"Üzüklərin hökmdarı"nın rejissoru Piter Cekson da ötən ay Kann Film Festivalındakı ustad dərsi zamanı süni intellektdən "xoşu gəlmədiyini deyə bilməyəcəyini" qeyd edərək, bu texnologiyanı "xüsusi effektə" bənzədib.

Digər tərəfdən, "Panın labirinti"nin rejissoru Gilyermo del Toro ötən ay sənətin bir tətbiqlə yaradıla biləcəyinə inananları sərt sözlərlə tənqid edib. Rejissor hələ ötən il də öz filmlərində generativ süni intellektdən istifadə etməkdənsə ölməyi üstün tutacağını qəti şəkildə bildirmişdi.

• Kinematoqrafçılar İttifaqının sədri postuna namizədlər bilindi
• İbrahim Tatlısesdən süni intellektlə yeni klip
• ARKA dövlət dəstəyi ilə film layihələri müsabiqəsinə başladı