Televiziyanın ən nüfuzlu mükafatlarından biri olan “Emmi” 2027-ci ildən etibarən ənənəvi televiziya kanallarında yayımlanmayacaq. Mükafatlandırma mərasimi “Prime Video”ya keçir və bununla “Emmi”nin 70 ildən çox davam edən yayım ənənəsi başa çatır.

Kulis.az xəbər verir ki, "Amazon" və Televiziya Akademiyası arasında imzalanan altıillik müqaviləyə əsasən, 79-cu “Primetime Emmy Awards” mərasimindən başlayaraq mükafat gecəsi yalnız “Prime Video” platformasında yayımlanacaq.

Beləliklə, 1955-ci ildən bəri ABC, CBS, NBC və Fox kimi ənənəvi yayım kanalları arasında növbəli şəkildə nümayiş etdirilən mərasim yeni dövrə qədəm qoyur.

Televiziya Akademiyasının sədri Kris Abreqo bildirib ki, qərarın əsas üstünlüklərindən biri uzunmüddətli tərəfdaşlıqdır.

Onun sözlərinə görə, indiyədək yayım kanalının hər il dəyişməsi təşkilatçıların hər dəfə prosesə yenidən başlamasına səbəb olurdu. Altıillik əməkdaşlıq isə həm akademiyaya, həm də “Amazon”a illər ərzində auditoriyanı daha yaxşı tanımaq və layihəni inkişaf etdirmək imkanı verəcək.

“Emmi” ödənişsiz yayımlanacaq

Yeni sistemə keçid “Emmi”ni izləmək üçün mütləq “Prime Video” abunəliyinin tələb olunacağı mənasına gəlmir.

Televiziya Akademiyasının əsas şərtlərindən biri mükafat mərasiminin əvvəlki kimi ödənişsiz izlənilə bilməsi olub.

Bu baxımdan “Emmi”nin yeni yayım modeli digər böyük mükafat mərasimlərindən fərqlənir.

Televiziya tarixində böyük dönüş

“Emmi”nin “Prime Video”ya keçməsi ənənəvi televiziya ilə yayım platformaları arasında gedən rəqabətin daha bir mühüm göstəricisi hesab olunur.

Son illərdə televiziya üzrə ən nüfuzlu mükafatlarda əsas namizədlər və qaliblər getdikcə daha çox striminq platformalarında yayımlanan serial və verilişlərdən seçilir.

İndi isə həmin mükafatın özünün də yayımı rəqəmsal platformaya keçir.

Bu qərar Oskarın gələcək yayım modeli ilə də müqayisə edilir. Oskar mərasimi ilə bağlı 2025-ci ildə açıqlanan razılaşmaya əsasən, mükafat gecəsi 2029-cu ildən “YouTube” üzərindən yayımlanacaq.

“Emmi”nin “Prime Video”ya keçidi isə bundan fərqli olaraq daha tez — 2027-ci ildə qüvvəyə minəcək.

“Emmi” niyə auditoriya itirir?

Son illərdə böyük televiziya mükafatlarının əksəriyyətində olduğu kimi, “Emmi”nin də izləyici sayı əhəmiyyətli dərəcədə azalıb.

Bir vaxtlar mərasimi 20 milyondan çox tamaşaçı izləyirdisə, hazırda bu rəqəm təxminən 7 milyon civarındadır.

Bunun səbəbləri arasında tamaşaçıların parçalanması, ənənəvi televiziyadan rəqəmsal platformalara keçid və striminq xidmətlərinin sürətlə böyüməsi göstərilir.

"Amazon" rəhbərliyi hesab edir ki, “Prime Video” “Emmi”nin daha geniş auditoriyaya çıxmasına imkan verə bilər.

“Prime Video” və Amazon MGM Studios-un rəhbəri Mayk Hopkins bildirib ki, platforma daha gənc tamaşaçıları cəlb edə və mükafatların izləyici yaşını aşağı sala bilər.

Onun sözlərinə görə, “Prime Video” il ərzində öz istifadəçilərinə “Emmi”yə namizəd olan serial və aktyorları təqdim etməklə mükafat gecəsinin auditoriyasını da böyüdə bilər.

“Emmi”nin əsas problemi NFL idi

Mükafat mərasiminin televiziya kanallarındakı ən böyük problemlərindən biri ABŞ-də olduqca populyar olan NFL oyunları ilə üst-üstə düşməsi idi.

“Emmi” ənənəvi olaraq sentyabr ayında bazar və ya bazar ertəsi axşamları keçirilirdi. Bu isə mərasimin Amerika futbolu ilə birbaşa rəqabətə girməsinə səbəb olurdu.

Bu il vəziyyət daha da kəskinləşib. “Emmi” mərasimi “Kansas City Chiefs” və “Denver Broncos” komandalarının ESPN-də yayımlanan ilk “Monday Night Football” oyunu ilə eyni vaxta düşüb.

Nəticədə, futbol matçı mükafat gecəsini reytinq baxımından ciddi şəkildə geridə qoyub.

Tarix dəyişə bilər

“Emmi” mərasimi 2027-ci ildə yenə sentyabr ayında keçiriləcək.

Lakin yeni müqavilə dövründə tarixlə bağlı dəyişikliklərin mümkün olduğu da istisna edilmir.

Kris Abreqo bildirib ki, təşkilat “Amazon”la gələcəkdə mərasimin vaxtını dəyişdirmək imkanını müzakirə edib və belə bir addıma açıqdır.

Bununla belə, tarix dəyişikliyinin namizədlərin müəyyənləşdirilməsi, səsvermə və digər təşkilati proseslərə təsir edəcəyi vurğulanır.

“Mükafatın mahiyyəti ekranın hansı olduğundan asılı deyil”

Televiziya Akademiyası üçün əsas məsələ mərasimin hansı platformada yayımlanmasından daha çox, televiziyanın müxtəlif formalarını əhatə edə bilməkdir.

Kris Abreqonun sözlərinə görə, akademiya televiziyanı onun tamaşaçıya hansı ekran vasitəsilə çatdırılması ilə müəyyənləşdirmir.

Onun fikrincə, əsas məqsəd harada yayımlanmasından asılı olmayaraq ən yaxşı televiziya işlərini mükafatlandırmaqdır.

“Prime Video”nun canlı yayımlar sahəsində də artıq ciddi təcrübəsi var. Platforma təxminən on il əvvəl NFL oyunlarını yayımlamağa başlayıb və sonrakı illərdə müxtəlif böyük idman yarışlarını və canlı tədbirləri öz proqramına daxil edib.

Beləliklə, 2027-ci ildən “Emmi” üçün yeni mərhələ başlayacaq.

70 ildən çox ənənəvi televiziyada yayımlanan mükafat mərasimi artıq rəqəmsal platformanın əsas səhnəsinə keçir.

Ülvi Bahadır

• Sənət dünyasında mübahisə - Heykəl yonan robotlarla bağlı
• 13 yaşında atasını itirdi, 17 yaşında evləndi - Vısotskinin sevdiyi “Cadugər qadın” kim idi?
• MÜZAKİRƏ: "Çalışanın haqqına girmək adi normaya çevrilib" - Tərcüməçilər niyə qəpik-quruşa işləyir?