Fransanın şərqindəki bir muzey italyan rəssam Mauritsio Kattelanın milyonlarla dollar dəyərində olan məşhur əsərinin bir hissəsinin – bananın oğurlandığını elan edib.

Kulis.az xəbər verir ki, divara bantla yapışdırılmış bir banandan ibarət olan və "Komediyaçı" adlanan əsərin mərkəzindəki meyvənin yoxa çıxdığını şənbə günü bir mühafizəçi görüb.

Parisdəki məşhur "Centre Pompidou"nun bir qolu olan "Pompidou-Metz" muzeyi naməlum şəxs və ya şəxslər barəsində oğurluq ittihamı ilə prokurorluğa müraciət edildiyini bildirib. Muzeydən, həmçinin oğurlanmış bananın yenisi ilə əvəz olunduğu açıqlanıb.

Bu, incəsənət əsərinə zərər dəyən ilk hadisə deyil. Tez xarab olan bir meyvə olduğu üçün əsərdə istifadə edilən banan onsuz da hər üç gündən bir yenilənir. Ötən ilin iyul ayında bir ziyarətçi muzeydəki bananı yemişdi. Mühafizəçilər qısa müddətdə müdaxilə edərək onun yerinə yeni bir banan yapışdırmışdılar.

O vaxt Kattelan məsələyə münasibət bildirərkən ziyarətçinin yalnız bananı yeməyindən məyus olduğunu deyərək, "Kaş ki, bantı da yeyərdi" deyə zarafat etmişdi. Muzey isə o hadisə zamanı heç bir hüquqi tədbir görməmişdi.

Lakin bu dəfə şəxsin kimliyi məlum olmadığı üçün rəsmi şikayət edilib. Muzey rəhbərliyi bunun əsərə qarşı ikinci belə hadisə olduğunu və sənət əsərinə hörmət məsələsi kimi yanaşdıqlarını ifadə edib.

Sənətin nə olduğunu və dəyərinin necə müəyyənləşdiyini sorğulamağı hədəfləyən "Komediyaçı" ilk dəfə 2019-cu ildə Mayami Biçdəki "Art Basel" sərgisində nümayiş olunarkən 120 min dollarlıq qiyməti ilə böyük mübahisələrə səbəb olmuşdu. Elə həmin il performans sənətçisi David Datuna da sərgidəki bananı yeyərək gündəmə gəlmiş və bunu sadəcə "ac olması" ilə izah etmişdi.

İllər keçdikcə əsərin dəyəri daha da artıb. Kriptovalyuta sahibkarı Castin San (Justin Sun) 2024-cü ildə əsərin bir versiyasını 6,2 milyon dollara satın aldıqdan bir neçə gün sonra kameralar önündə bananı yemişdi.

Qeyd edək ki, Kattelan "Komediyaçı"dan başqa, ABŞ prezidenti Donald Trampa ilk prezidentliyi dövründə təklif edilən, tamamilə işlək vəziyyətdə olan 18 əyarlıq qızıldan hazırlanmış "Amerika" adlı unitaz əsəri ilə də tanınır. 2020-ci ildə İngiltərədə sərgilənən bu qızıl unitazı oğurlayan iki nəfər isə mart ayında təqsirli bilinmişdi. Əsər parçalanmış və qızılların heç birini tapmaq mümkün olmamışdı.

• Hamının bildiyi dastanda heç kimin görmədiyi sirrlər - Dədə Qorqud əslində, kimdir?
• İşə gecikdiyi üçün həbsxanaya düşən azərbaycanlı rəssam kim idi?
• Media və Yayım Şurası yaradılır