Məndən bir şey qalmaz bu yer üzündə

Media

Ana səhifə
Media

Məndən bir şey qalmaz bu yer üzündə - Günün şeiri

17 aprel 2024

13:00

Bu gün şair Xəyal Rzanın doğum günüdür.

Kulis.az müəllifi təbrik edir və "Məndən bir şey qalmaz bu yer üzündə" şeirini təqdim edir.

Məndən bir şey qalmaz
Bu yer üzündə
Bir qara köpük də
Bir qara daş da
İndi hər nə varsa
Göy üzündədi
Qanadlı balıq da
Qanadsız quş da
Məndən bir şey qalmaz
Bu yer üzündə
Nə şeir, nə yazı, nə söz, nə söhbət
Bütün yetimlərə mərhaba...
Bir də...
Məhəbbət, məhəbbət, yenə məhəbbət!
Məndən bir şey qalmaz
Bu yer üzündə
Mənim nəyim var ki
Mənim kimim var
Yeyib-bitiriblər bütün dünyanı
Bircə mən qalmışam...
Və... Qarışqalar
Məndən bir şey qalmaz
Bu yer üzündə
Yosunlar ehsandı ayaq izimdə
Məndən heç nə qalmaz
Bu yer üzündə
Nə Allah özündə, nə göy özündə
Məndən heç nə qalmaz
Bu yer üzündə...
Yosunlar, yosunlar, yazıq yosunlar
Hər şey mənimlədir, yerdən göyədək
Bütün başlanğıclar və bütün sonlar