Azərbaycanın Belçikadakı səfirliyində “İRS” Nəşriyyat Evinin yeni kitablarının sərgisi təşkil olunub.

Kulis.az xəbər verir ki, tədbirin açılışında çıxış edən ölkəmizin Brüsseldəki səfiri Vaqif Sadıqov bildirib ki, ölkənin aparıcı nəşriyyatlarından olan “İRS” Azərbaycanın tarixi, mədəniyyəti, incəsənəti və memarlığına dair çoxsaylı kitab və jurnallar nəşr edir. Bu nəşrlər müxtəlif xarici dillərdə çap olunaraq beynəlxalq auditoriyaya təqdim edilir.

Daha sonra “İRS” Nəşriyyat Evinin və Bakı Dövlət Universitetinin Mədəni İrsi Araşdırma Mərkəzinin direktoru Musa Mərcanlı nəşriyyatın fəaliyyəti, həyata keçirdiyi layihələr və Azərbaycanın zəngin mədəni irsinin dünyada tanıdılması istiqamətində görülən işlər haqqında məlumat verib. O qeyd edib ki, “PAŞA Həyat Sığorta” şirkətinin dəstəyi ilə 2013-cü ildən həyata keçirilən “İrs” silsiləsi layihəsi çərçivəsində Azərbaycanın mədəni irsini əks etdirən çoxsaylı nəşrlər hazırlanaraq geniş oxucu kütləsinə çatdırılıb.

Musa Mərcanlı sərgidə nümayiş olunan kitabları təqdim edib və iştirakçıların suallarını cavablandırıb.

Tədbirdə çıxış edən Brüssel Azad Universitetinin professoru Philippe Humble “İRS” nəşrlərində işıqlandırılan mövzular barədə fikirlərini bölüşərək, Azərbaycanla bağlı təəssüratlarından danışıb. O, həmçinin multikulturalizmin cəmiyyətlər arasında qarşılıqlı anlaşma və əməkdaşlığın inkişafında mühüm rol oynadığını vurğulayıb.

“Travel Tomorrow” media şirkətinin rəhbəri Antonio Buscardini isə çıxışında Azərbaycana səfərləri zamanı şahidi olduğu zəngin tarixi-mədəni irs, ölkənin geniş turizm imkanları və beynəlxalq nüfuzunun artması barədə fikirlərini tədbir iştirakçıları ilə bölüşüb.

Sərgidə Belçika ictimaiyyətinin və diplomatik korpusun nümayəndələri, eləcə də bu ölkədə yaşayan Azərbaycan icmasının üzvləri iştirak ediblər.

Tədbir Belçikada təhsil alan azərbaycanlı musiqiçilərin təqdim etdiyi klassik və milli musiqi proqramı ilə davam edib. Musiqi nömrələri qonaqlar tərəfindən böyük maraqla qarşılanıb.

Sərgi çərçivəsində iştirakçılar nümayiş etdirilən nəşrlərlə yaxından tanış olmaq imkanı əldə ediblər.

• Rusiya hücumlarından sonra Ukraynaya 35 min kitab göndəriləcək
• Direktor: "BMT-nin Sivilizasiyalar Alyansı Azərbaycan hökuməti ilə sıx əməkdaşlıq edir"
• Muzeylərdə yeni nümayiş forması - Artan soyğunlarla bağlı