Kulis.az Tural Turanın "İrəvanda imza günüm olsun" yazısını təqdim edir.

Düşünürəm ki, erməni yazıçıların əsərlərinin Azərbaycan dilinə tərcüməsinin vaxtı çatıb. Artıq ortada heç bir maneə yoxdur. Ölkəmiz öz ərazi bütövlüyünü bərpa edib. İndi günəşli sabahlara baxmaq vaxtıdır. Hətta deyərdim ki, hər iki ölkənin şair və yazıçıları qonşu dövlətlərin sülh diplomatiyasına öz mədəni töhfələrini də verə bilər.

Ədəbiyyat və mədəniyyət hər zaman xalqlar arasındakı uçurumlara körpü olub. Sənət hər zaman bəşəridir və missiyası bütün bəşəriyyətə sülh çağırışları etməkdir. Ona görə də azərbaycanlı və erməni yazıçılar bu iki xalqı sülhə hazırlamalıdır.

Otuz beş ildən artıqdır ki, biz bir-birimizin ədəbi-mədəni həyatında baş verən hadisələri izləyə bilməmişik. Bu baxımdan, həm erməni yazıçı və şairlərlə, həm də onların əsərləri ilə tanış olmaq məsələsini yubatmamalıyıq.

Biz iki qonşu xalq kimi bir yerdə yaşamağa məhkumuq. Bunu bizimkilər çox yaxşı başa düşür, ermənilərin içərisində də anlayanlar var. Azərbaycanlı şair və yazıçılar düşüncəsi torpaq iddiası və türk düşmənliyi ilə zəhərlənməmiş həmkarlarına bu işdə kömək etməlidirlər.

İlk addım kimi əsərlərin tərcüməsindən başlamaq ən unikal addımdır. Sonrakı mərhələlərdə erməni və azərbaycanlı yazarlar üçüncü ölkədə - məsələn, qonşu Gürcüstanda, Rusiyada, Türkiyədə görüşə bilər. İnanıram ki, bu cür aktivitələr hər iki xalqın yaxınlaşmasına, münasibətlərdəki buzların əriməsinə böyük töhfələr verəcək.

Fikrimcə, bu işdə əsas moderatorluğu və katalizatorluğu hər iki ölkənin yazıçılar birlikləri etməlidir. Azərbaycan Yazıçılar Birliyi İrəvana xoşniyyətli məktub göndərə bilər. Hətta AYB-nin üzvü olmayan istedadlı yazıçılarımız da bu xoşməramlı niyyətin, çağırışın altına imza atarlar.

Sadəcə, başda AYB sədri Anar müəllim Rzayev olmaqla, qurumun idarə heyəti bu barədə baş sındırıb yol xəritəsi hazırlasalar, kifayətdir.

Keçmişimizi unutmamalıyıq, amma sabahlarımızı da özümüz işıq gələn tərəfə istiqamətləndirməliyik.

Sülh sazişi imzalanandan sonra bu cür bünövrələrin üzərində yazarların Azərbaycana və Ermənistana səfərləri də gerçəkləşəcək. Təsəvvür edin, bizdən hansısa şairin İrəvanda, Basarkeçərdə, Gorusda imza günü, erməni oxucularla görüşü baş tutur. Erməni həmkarlarımız da Bakıya, Qubaya, Gəncəyə ayaq açırlar, buradakı oxucularına kitab imzalayırlar. Təsəvvürü belə gözəldir...

Məsələn, mən istərdim ki, İrəvanda erməni dilində kitabım çap edilsin. Göyçə gölünün kənarındakı hansısa yaradıcılıq evinə ezamiyyətə gedim, erməni kökənli oxucularım olsun, onlar üçün kitablarımı imzalayım.

Biz sülhsevər xalqıq. Bunu bacara bilərik. İnanıram ki, Ermənistanda da mənim kimi düşünən həmkarlarım var və səsimizə səs verəcəklər...

Erməni həmkarlarım! Söz hər şeyə qadirdir, çünki söz və onun qüdrəti insanlıqdan daha əvvəl yaranıb... Uzatdığımız əlimizi tutun ki, sülh və barış qoxusu havadan asılı qalmasın...

• "Bu hekayəni Vüqar yox, Süni Zəka yazıb..." - Hekayə müzakirəsi
• Folkner kimi təhdid etmişdi? - Xavier Mariasın essesi
• "Oskar" qazanan ilk ingilis aktrisa - Çörçill onun haqqında nə demişdi?