Dünya miqyasında 75 milyondan çox kitabı satılan məşhur yazıçı Sara C. Maas "Güllər və tikanlar sarayı" seriyasından iki yeni romanının işıq üzü görəcəyini elan edib.

Kulis.az xəbər verir ki, 40 yaşlı amerikalı yazıçı bu xəbəri çərşənbə axşamı Aleks Kuperin "Call Her Daddy" podkastında paylaşıb.

"Bu, bir trilogiya deyil"

Əsərləri 40 dilə tərcümə olunan yazıçının yeni kitabları bu ilin oktyabrında və 2027-ci ilin yanvarında oxuculara təqdim olunacaq. Maas yeni layihəsinin quruluşu haqqında maraqlı detalları bölüşüb:

"Əslində, üç kitabın (ACOTAR 6, ACOTAR 7 və hələ elan olunmamış növbəti kitab) dörd hissədən ibarət vahid bir süjet xətti var. Bu, trilogiya deyil, hadisələr hər kitabın sonunda yekunlaşmır. Onu bir trilogiya kimi yox, bir nəhəng, bütöv hekayə kimi oxumaq lazımdır. Mən heç vaxt hekayəni bu cür danışmamışdım."

#BookTok fenomeninin hərəkətverici qüvvəsi

2021-ci ildən bəri kitab nəşr etdirməyən Sara C. Maas üçün bu dördillik fasilə onun karyerasındakı ən uzun sükut idi. Buna görə də, bir neçə ay fərqlə iki kitabın çap olunması yazıçı üçün gözlənilməz və cəsarətli addım hesab olunur.

Xatırladaq ki, Maasın yaradıcılığına maraq xüsusilə pandemiya dövründə kəskin şəkildə artıb. O, həmçinin TikTok-un ədəbiyyat seqmenti olan #BookTok-da "romantaziya" janrının (romantika və fantaziya) populyarlaşmasında əsas sima hesab olunur. Yazıçı həm də 8 kitabdan ibarət "Şüşə taxt" (Throne of Glass) və 3 kitabdan ibarət "Ayparalı şəhər" (Crescent City) seriyalarının müəllifidir.

• Məşhur aktyorun halı pisləşdi – Səbəb
• Fransız akademizmi ilə yapon ruhunun sintezi - “Ark-la-Batay mənzərəsi”nin pərdəarxası məqamları
• “Kür” sənədli filmi beynəlxalq layihədə qalib oldu