Bu gün dünyaşöhrətli azərbaycanlı alim, qeyri-səlis məntiq nəzəriyyəsinin banisi, Kaliforniya Berkli Universitetinin fəxri professoru Lütfi Zadənin anadan olmasının 105 illiyi tamam olur.

Cəfər Cabbarlı adına Respublika Gənclər Kitabxanasında bu münasibətlə alimin zəngin elmi fəaliyyətindən və mənalı ömür yolundan bəhs olunan “Dünyaşöhrətli alim Lütfi Zadə -105” adlı elektron məlumat bazası hazırlanıb.

Kulis.az xəbər verir ki, elektron məlumat bazası kitabxananın rəsmi saytında yerləşdirilib.

Hazırlanan materialda Lütfi Zadənin həyat və fəaliyyətinin əsas tarixləri, bir sıra görkəmli şəxslərinin onun haqqında söylədikləri dəyərli fikirlər, rəsmi sənədlərlə yanaşı, “Qeyri-səlis məntiq nəzəriyyəsinin banisi”, “Dünyanı bütün çalarları ilə qavrayan Azərbaycanlı dahi” və “Lütfi Zadə - xəyalla həqiqət arasındakı səddi aradan qaldıran şəxsiyyət” məqalələrinin tam mətni yer alır.

Elektron bazada alimin müəllifi, redaktoru olduğu nəşrlərin, məqalələrin, eləcə də onun haqqında qələmə alınan kitab və dövri mətbuat nümunələrinin siyahıları təqdim edilir. Kitabxana əməkdaşları tərəfindən hazırlanan bazada görkəmli alimin sevimli kəlamları, xatirəsinin əbədiləşdirilməsi, adına təsis edilən təqaüdlər haqqında məlumatlar da yer alır.

Elektron bazada “Lütfi Zadə haqqında bilmədiklərimiz”, “Dissertasiya və avtoreferatlar”, “Filmoqrafiya”, “Virtual sərgi”, “Foto və videoqalereya” bölmələri də istifadəçilərə təqdim olunur.

Elektron məlumat bazasında “Uzaq və yaxın sərvətimiz – Lütfi Zadə” adlı videomaterial da yer alır. Materialda Lütfi Zadəyə dünyaşöhrəti qazandıran və istehsalatda geniş tətbiq edilən, eyni zamanda, dünya elmində inqilab sayılan qeyri-səlis məntiq nəzəriyyəsi, “Təəssüratlar nəzəriyyəsi”, “Sistemlər nəzəriyyəsi”, “Sözlə işləyən kompüter nəzəriyyəsi”, “Optimal süzgəclər nəzəriyyəsi” kimi dünya elminin inkişafında, onun yeni əsaslar üzərində qurulmasında mühüm rol oynayan elmi kəşfləri haqqında məlumat verilir. Kitabxana əməkdaşları tərəfindən hazırlanan materialda Lütfi Zadə haqqında xatirələr səsləndirilir, həyat və elmi fəaliyyətini əks etdirən, müxtəlif konfrans və görüşlərdə lentə alınan foto və videogörüntüləri təqdim edilir.

“Uzaq və yaxın sərvətimiz – Lütfi Zadə” adlı videomaterial kitabxananın rəsmi saytında yerləşdirilib.

• 10410-cu gün - Ömər Xəyyamın hekayəsi
• Milli Qurtuluş Günü münasibətilə kitab sərgisi açıldı
• Bir sən, bir mən olum, bir uçuq kaha - Əliağa Kürçaylı