Amerikalı müğənninin ölümü ilə bağlı detallar ortaya çıxdı

Media

Ana səhifə
Media

Amerikalı müğənninin ölümü ilə bağlı detallar ortaya çıxdı

26 avqust 2026

18:15

R&B musiqisinin unudulmaz simalarından olan Aliyanın keçmiş sevgilisi Deymon Daş müğənninin vəfatının ildönümündə dəhşətli qəzadan əvvəl yaşanan son anları bölüşüb.

Kulis.az xəbər verir ki, bu haqda o, "Us Weekly" jurnalına verdiyi müsahibədə danışıb.

Müğənninin 25 avqust 2001-ci ildə Baham adalarında baş verən təyyarə qəzasında 22 yaşında faciəvi şəkildə həlak olmasından əvvəl Deymon Daşa həyəcanlı mesajlar göndərdiyi ortaya çıxıb.

"Rock the Boat" klipinin çəkilişlərini tamamladıqdan sonra Floridaya qayıtmağa hazırlaşan Aliya uçuşdan öncə Daşa "Təyyarədən heç xoşum gəlmədi" yazaraq narahatlığını bildirib.

Müğənninin hər zaman uçmaqdan qorxduğunu qeyd edən Daş, ona təyyarəyə minməməyi məsləhət görsə də, Aliyanın çəkiliş qrafikinə görə qayıtmağa məcbur olduğunu ifadə etdiyini deyib.

Xatırladaq ki, müğənni və 8 nəfərin həyatını itirdiyi qəza ilə bağlı aparılan təhqiqatlar təyyarənin təxminən 317 kiloqram artıq yükləndiyini və balansı pozulduğunu göstərib.

Həmçinin pilotun uçuş icazəsinin olmadığı və qanında qadağan olunmuş maddələr aşkarlandığı bəlli olub.

Müğənninin ailəsi tərəfindən nəqliyyat şirkətinə qarşı qaldırılan məhkəmə iddiası 2003-cü ildə tərəflərin məxfilik müqaviləsi imzalaması ilə yekunlaşıb.