1000-dən çox sənətçi İsrailin iştirakına görə 2026-cı il Avroviziya Mahnı Müsabiqəsini boykot etməyə çağırıb.

Kulis.az xəbər verir ki, "No Music for Genocide" kampaniyasının saytında 1000-dən çox sənətçinin imzasını daşıyan açıq məktub yayımlanıb.

Qəzzada soyqırımın üç ildir davam etdiyi bir vaxtda İsrailin səhnədə yer almasına etiraz edilən açıqlamada Rusiyanın Ukraynaya hücumlarına görə "Avroviziya"dan kənarlaşdırıldığı xatırladılıb.

"Avroviziya"nın cinayətləri ört-basdır etməsinə rədd cavabı

Məktubda deyilir:

"Musiqiçilər və mədəniyyət işçiləri olaraq əksəriyyətimiz Avropa Yayım Birliyi (EBU) üzvüyük. "Avroviziya"nın İsrailin fələstinlilərə qarşı həyata keçirdiyi soyqırımı, mühasirəni və amansız hərbi işğalı ört-basdır etmək, normallaşdırmaq üçün istifadə olunmasını rədd edirik. EBU cinayət ortağı olan İsrail yayımçısı KAN-ı qadağan edənə qədər ictimai yayımçıların, sənətçilərin, şənlik təşkilatçılarının, komandaların və pərəstişkarların "Avroviziya"nı boykot etməsi çağırışlarını dəstəkləyirik".

EBU-nun ikiyüzlü siyasəti

EBU-nun Rusiya və İsrailin cinayətlərinə verdiyi ikiyüzlü reaksiyanın "Avroviziya"nın iddia etdiyi "bitərəflik" illüziyasını ortadan qaldırdığı vurğulanan açıqlamada 2022-ci ildə qurumun Rusiyanın iştirakının "müsabiqənin nüfuzuna xələl gətirəcəyini" əsas gətirdiyi xatırladılıb. Bildirilib ki, Qəzzada 30 aydan çoxdur soyqırımı cinayətinin törədilməsinə, İordan çayının qərb sahilində etnik təmizləmə aparılmasına və fələstinlilərin torpaqlarının qəsb edilməsinə baxmayaraq, İsrailə eyni siyasət tətbiq olunmur.

Bəzi məqamlarda səssizliyin bir seçim olmadığı qeyd edilən bəyanatda "ABŞ və İsrailin "Yeni Qəzza"da həddindən artıq nəzarət altında olan islah düşərgələri qurmaq planları varkən, hansı sənətçi və ya "Avroviziya" pərəstişkarı vicdanla Avstriyada keçiriləcək növbəti müsabiqəyə qatıla bilər?" - deyə sual ünvanlanıb.

İsrailin soyqırımı davam edərkən səssiz qalmağın mümkünsüzlüyü vurğulanan məktubda bu sözlər yer alıb:

"İsrail həbsxanalarındakı uşaqlar bir melodiya zümzümə etdiklərinə görə döyüldüyü halda, Qəzzadakı demək olar ki, hər bir səhnə, studiya, kitab mağazası və universitetdən geriyə qalan tək şey altında qətlə yetirilmiş cəsədlərin hələ də çıxarılmağı və uyğun şəkildə dəfn edilməyi gözlədiyi dağıntı yığınlarıdır... Sənətçilər olaraq, kollektiv təsir və rədd etmə gücümüzün fərqindəyik. Səssiz qalmağı rədd edirik. Cinayət ortağı olmağı rədd edirik. Sektordakı digər şəxsləri də bizə qoşulmağa çağırırıq. Və hər bir sahədə bu cinayət ortaqığına son qoymaq üçün göstərilən bütün prinsipial səylərlə həmrəyik".

Boykota qatılan sənətçilər arasında "Avroviziya"nın keçmiş qalibləri Emmeli de Forest və Çarlie Makkettiqan ilə yanaşı, musiqiçi və bəstəkar Rocer Uoters, amerikalı repçi Maklemor, Peter Qabriel, həmçinin "Massive Attack", "Idles" və "Kneecap" musiqi qrupları da yer alır

• Türkiyədə seriallara nəzarət gücləndirilir
• Çingiz Abdullayev: "Müharibə mövzusunda yazan yazıçılara dəstək göstərilməlidir"
• "Anar Məmmədxanov mənə “Moruq” deyirdi" - “Bacanaqlar”ın “Qismət”i ilə müsahibə