Badımcan məsələsi

Badımcan məsələsi
24 sentyabr 2012
# 15:42
ANS-in canlı efirində söyüş səslənməsinə görə cəmiyyətdən sərt reaksiya eşidilməsə də, kanal özünü təmizə çıxartmaq üçün bütün mümkün variantlardan istifadə edir.

Xatırlayaq ki, Azərbaycan futbol millisinin Portuqaliya oyununda da oyunçularımızın söyüşməsini AzTV ekranından bütün Azərbaycan izlədi. O zaman telekanal açıqlama verdi, məsələ qapandı.

Biz TV eksperti deyilik, canlı efirdə bu cür fors-major hallarda nə ediləcəyini bilmirik.

Amma belə məlum olur ki, elə ANS-in rəhbəri Vahid Naxışın da biliyi bizdən çox deyil: “Amerika Birləşmiş Ştatlarındakı dostlarımıza, həmkarlarımıza müraciət etmişik ki, belə gözlənilməz faktların qarşısını almaq istiqamətində əldə etdikləri təcrübəni bizimlə bölüşsünlər”.

Özlərini fəxrlə “ölkənin ilk müstəqil telekanalı” adlandıran ANS-çilərin indiyə qədər canlı efir hazırlığı yoxuydu?

Hərçənd, ANS bilməli idi ki, insanların ailə problemlərini efirə çıxaranda ortaya badımcan söhbəti də çıxacaq...

Hərçənd ANS bilməli idi ki, özünə xəbər kanalı deyən bir televiziya bu cür şoular üzərindən reytinq qazanmağa cəhd etməz.

Hərçənd ANS bilməli idi ki, işçini işdən çıxarmaqla problemi həll etmək mümkün deyil.

Biz tanıdığımız ANS bilməliydi...

Kanalın rəsmiləri - Mirşahin, Mais Məmmədov və Vahid Mustafayev “üçüncü qüvvələr” üzərində dayandı. Bax bu, artıq mifdir, kanal rəhbərliyinin reallıq hissini itirdiyini göstərir.

Canlı efirdə fors-major hallara necə reaksiya verildiyini bilməyən kanal fors-major halda hazırlıqsız yaxalanır və bunu “üçüncü qüvvələrin təxribatı” hesab edir, vətənpərvərlikdən danışır.

Dəvənin ipini möhkəm bağlayıb Allaha təvəkkül etmək əvəzinə, dəvəni boş buraxıb onun başına gələnləri “üçüncü qüvvənin təxribatı” saymaq sizə ciddimi gəlir?

Və... Kimdir bu üçüncü qüvvə?

Bəlkə elə o badımcanın özüdür?

kulis.az
# 1698 dəfə oxunub

Oxşar xəbərlər

# # #