Kulis.az iş yoldaşlarının adamı əsəbiləşdirən 16 hərəkətini təqdim edir.
1. Pıçapıç
Yəqin məndən danışırlar, yoxsa niyə belə səssiz danışsınlar ki! Mən olmasam da yəqin hansısa iş yoldaşımızın torbasını tikirlər.
2. Ortaq dostlardan dedi-qodular
Axı mən bu söhbətə qarışmaq istəmirəm. Niyə dinləmək məcburiyyətində qalmalıyam? Sözünüz varsa gedin, özünə və üzünə deyin.
3. Boş mübahisələr
İlahi! Sakitləşmirlər. Bayaqdan baş-beynim gedib. Görəsən, nə etsəm mübahisəni bitirərlər? Özü də işimizə-gücümə, həyatımıza dəxli olmayan bir mövzuda biri-birini qırırlar.
4. Siyirməndən nəyinsə götürülməsi
Əlini atırsan, yoxdur. Götürməmiş demirsinizsə, heç olmasa götürəndən sonra deyin.
5. Telefonla bərkdən və uzun-uzadı danışmaq
Bütün otağı şoka salır. Heç kim iş görə bilmir. Hələ bu söhbət əsəbi tonda gedirsə, etiraz da eləməyə qorxursan.
6. Bərkdən asqırmaq, gülmək, əsnəmək
Elə adam var, üstündə xüsusi qeyd gəzdirməlidir: “Mən bərkdən asqırıram!” Yoxsa kiminsə, tanımayan birinin ürək-görbəyi düşər. Bina elə silkələnir, elə bilirsən zəlzələdir. Asqırmağı bildik, bəs gülməyə və əsnəməyə sözünüz nədir? Onu bir az aşağıdan icra etmək olar axı. Kobudlar!
7. Vacib iş gördüyün yerdə gəlib söhbətə tuturlar
Hələ bir lətifə də danışırlar, sən də yalandan gülməyə məcbur olursan. Nə qədər yorucu və cansıxıcıdır. Neyləyəsən.
8. Gün ərzində masanızın tez-tez işğal olunması
Vəzifəcə səndən bir az yuxarıdırsa, ümumiyyətlə dinə bilmirsən. Sən indi yerinə keçməyi necə də ürəkdən arzulayırsan, amma o, durmaq bilmir, bu hərəkətindən xüsusi zövq alır.
9. İşə ev heyvanı, yaxud uşaq gətirmək
İlkin dəqiqələrdə sevimli olur, bir az keçəndən sonra yorucu.
10. Kəskin qoxulu yeməklər yemək
Lütfən, etməyin. Bunun üçün yeməkxana var. Yoxdursa olmalıdır. Olmursa, heç olmasa yeməyin çeşidinə fikir verin. İşə xaş gətirəsi deyilsiniz ki!
11. Cip telefonun gurultulu zəngi.
İllah da sahibi otaqda yoxsa. Az qala götürüb yerə çaxacaqsan. “No” düyməsini basmaq istərdin, düzgün anlaşılmaz deyə çəkinirsən. Zəngə bu qədər də səs verərlər? Zövqmü alırsınız? Sahibi otaqda olanda da bir ayrı dərddir. Açmırsan, heç olmasa səsini qıs. Texniki cəhətdən mümkündür. Bilmirsinizsə, məmnuniyyətlə öyrədərəm.
12. Sən olmayanda masandan səliqəsiz istifadə
Soruşsan kim edib, boynuna alan olmayacaq. Deyinə-deyinə təmizləyirsən ki, bəlkə gələn dəfə təkrar olmasın. Elə bil işdən qovulmağını gözləyirlər.
13. Birinin özünü daha işgüzar göstərməsi
Guya qalanları kartof toplayır. Olur də, bir gün biri bir az çox işləyir. Gərək o saat qürrələnib beynəlxalq statusa verəsən. Bir az təvazökar ol.
14. İşlə bağlı soruşduğun vacib bir sualı cavablandırmır, yaxud gec cavablandırır
Təbii. Çox məşğuldur. Suala cavab vermək ona mane ola bilər. Başındakı elmi hipoteza dağıla bilər. Ya da ən azı xançalının qaşı düşər.
15. Əl-qolla, him-cimlə danışmaq
Ay balam, şəxsi sözün varsa, Facebookdan, Vatsapdan, mesajdan yaz, indi hansı zəmanədir? Bəlkə bir göyərçin tapım ayağına məktub bağlayasan?
16. Ağır-ağır və səsli nəfəs almaq
Bəzən az qala balina kimi fit verənlər olur. Bu yeknəsəq hərəkət xüsusilə sakit otaqda xüsusi əsəb gərginliyi yaradır.
