İranda dövlət himayəsində olan media qurumları məşhur ingilis romançı Salman Rüşdinin başına 600 min dollar mükafat qoyub. Kulisin türk mətbuatına istinadən verdiyi məlumata görə İranın yarı rəsmi Fars xəbər agenti 30 min dollarla ən çox dəstək verən media orqanı olub.
40-a yaxın media qurumunun S. Rüşdünün öldürülməsi üçün göstərdiyi bu dəstək 1989-cu ildə verilən fitvadan sonra gerçəkləşdirilən ən böyük ortaq cəhd hesab olunub.
Elan İran İslam Republikasının siyasi, hüquqi və ruhani öndəri Ayəttullah Xomeyninin Rüşdü haqqında verdiyi fitvanın 27-ci il dönümündə yayılıb.
Xatırladaq ki, İranın ilk lideri Xomeyni S. Rüşdünün “Şeytan ayələri” kitabında İslam dəyərlərini təhqir etdiyi üçün ona ölüm fitvası çıxartmışdı. Xomeyni təkcə yazıçının deyil, kitabı çap edən bütün adamların öldürülməsini tələb etmişdi.
