Arxeoloqlar Qvatemalada yerləşən qədim Maya şəhəri Naaxtunda mozaikalı masa oyununun qalıqlarını aşkar ediblər.
Kulis.az xəbər verir ki, tapıntı qədim dövrlərdə oynanan oyunlar haqqında yeni və mühüm məlumatlar verir.
Söhbət Patolli adlı oyundan gedir. Bu oyun Azteklər və onlardan əvvəlki Mezoamerika mədəniyyətlərində oynanılan “ludo” tipli ən qədim strateji masa oyunlarından biri hesab olunur.
Xaç formasında olan və 52 xanadan ibarət taxtada oynanılan oyunda hər oyunçu dörd və ya altı daşdan istifadə edir. Məqsəd daşları başlanğıc nöqtəsindən çıxarıb bütün taxtanı dövr etdikdən sonra yenidən geri qaytarmaqdır. Bunu ilk bacaran oyunu qazanır. Daşların nə qədər irəliləyəcəyini isə bir üzü işarələnmiş patol lobyaları müəyyən edir. Beş lobya eyni anda atılır və işarəli lobya sayı qədər xanada irəliləyiş edilir.
Patolli oyununun qədim Maya cəmiyyətlərində də oynanıldığı məlum idi, lakin bu dövrə aid oyun qaydaları indiyə qədər dəqiq bilinmirdi. Naachtun şəhərində aparılan son qazıntılar bu qeyri-müəyyənliyə işıq salır.
Qazıntılar zamanı yerə həkk olunmuş “oyun taxtası” aşkar edilib. Taxtanın bəzi hissələri zədələndiyindən onun ümumi quruluşu ehtimallar əsasında bərpa olunub.
