Türkiyədə məşhurlara qarşı aparılan narkotik istintaqı çərçivəsində yeni əməliyyat keçirilib.
Kulis.az xəbər verir ki, əməliyyat zamanı müğənnilər Simge Sağın, Melek Mosso, Mustafa Ceceli, Ersay Üner və Bengü Erdən, həmçinin aktyor İbrahim Çelikkol, Deha Bilimlier və Aslı Sipahi Hacısüleymanoğlu saxlanılıb.
Beykoz Cumhuriyyət Baş Prokurorluğundan verilən açıqlamada bildirilib ki, istintaq İstanbul İl Jandarma Narkotik Cinayətlərlə Mübarizə Şöbəsi ilə koordinasiyalı şəkildə aparılır.
Açıqlamada qeyd olunub ki, “ictimaiyyətə tanış şəxslərə” qarşı “istifadə məqsədilə narkotik və ya psixotrop maddə alma, qəbul etmə və ya saxlama, eləcə də narkotik maddə istifadə etmə və təmin etmə” ittihamları üzrə aparılan araşdırma çərçivəsində əldə edilən sübutlar, daxil olan məlumat və şikayətlər əsasında adıçəkilən şəxslərin bu cinayətlərdə iştirak etdiyi müəyyən edilib.
Bu əsasla, Beykoz Sülh Cinayət Hakimliyinin qərarı ilə 7 aprel 2026-cı il tarixində eyni vaxtda saxlanılma, axtarış və müsadirə tədbirləri həyata keçirilib. İstintaqın davam etdiyi bildirilir.
