Kulis.az əməkdar artist Gülnar Salmanova haqqında 10 maraqlı faktı təqdim edir.
Neftçala rayonunun Xıllı qəsəbəsində anadan olan Gülnar Salmanova 1978-ci ildə ailə həyatı qurub. Bir il sonra onun oğlu dünyaya gəlib. Lakin bir müddət sonra aktrisa həyat yoldaşından ayrılıb, oğlunu tək böyütməyə qərar verib.
***
Aktrisa müsahibələrinin birində deyir: “Həyat yoldaşımdan xəyanət üstündə ayrıldım. O vaxt öz puluma özümə yeni ev də aldım. Teatrda çalışanda oğlumu qaynanam saxlayırdı, yoldaşımdan ayrılandan sonra ona anam baxdı. Altı yaşı olanda oğlumu məktəbə özüm aparıb-gətirirdim. Oradan da çıxıb gəlirdim teatra. Bəzən o da dəftər-kitabını götürüb mənimlə birlikdə teatra gəlirdi. Çox sakit uşaq idi, bir küncdə oturub dərsləri ilə məşğul olurdu. Anam rəhmətə gedəndən sonra övladımı tək böyüdüb, tək də yaşadım.”
Ailəli ola-ola İncəsənət universitetinin musiqili komediya fakültəsində təhsil alan aktrisa 1981-ci ildə oranı bitirib. Həmin ildən Azərbaycan Musiqili Komediya Teatrında işləyib. Aparıcı səhnə ustası, güclü və məlahətli soprano səsə malik idi. Əsasən "Subretka" ampluasında teatrda və televiziya ekranlarında fəal çıxış edirdi.
Aktrisa teatra yenicə gəldiyi illərdə teatrda Vaqif İbrahimoğlunun qurluşunda hazırlanan "Arşın mal alan" əsərində Gülçöhrə rolunu ifa edərkən digər aktrisa Sona Həsənova ilə konflikt yaşayıb. Hətta aktrisa səhnəyə təzimə çıxanda Sona Həsənova onu yumruğu ilə itələyib.
***
Aktrisaya ən böyük məşhurluğu isə 80-ci illərdə “Səhər görüşləri” proqramındakı obrazı gətirdi. Bu səhnəcikdə aktrisa aktyor Ağaxan Salmanlının arvadı rolunda çıxış edirdi. Həyatda hər iki aktyorun soyadı bənzər olduğundan tamaşaçılar onları həyatda da ər və arvad hesab ediblər. Ağaxan Salmanlı bu barədə belə deyirdi: Tamaşaçıların böyük əksəriyyəti bizi ər-arvad kimi tanıyıblar. Məni tədbirlərə, toya çağırıblar. Mən də getmişəm. Tökülüşüblər üstümə ki, niyə tək gəlmisən, biz elə bilirdik yoldaşınla gələrsən. Əvvəl başa düşmürdüm, yoldaşımın bura nə dəxili. Sonradan Gülnarın hal-əhvalını soruşanda, bilirdim ki, bunlar səhv salıblar. Açıqlayırdım ki, biz sənət yoldaşıyıq, həyat yoldaşı yox. Soyadlarımızın eyniliyi siz çaşdırmasın".
Gülnar Salmanova gənc yaşda qazandığı şəkər xəstəliyindən uzun illər əziyyət çəkib. Lakin ömrünün son illərində o, böyrək çatışmazlığından və xərçəngdən müalicə olunurdu. Onun sözlərinə görə ağır xəstələnməsinə səbəb həkimin ona vurduğu səhv iynələr olub. O, müsahibələrinin birində deyirdi: Neçə il bundan əvvəl yüngül bir xəstəliyim var idi, həkim pula görə mənə səhv iynə vurdu. Xəstəlik də elə oradan başladı. Onu Allaha tapşırmışam. Səhv iynə ucbatından məni pis günə qoydu. O, çox pis insandır”. Sonralar aktrisanın vəziyyəti pisləşəndə həmin həkim onun evinə gələrək sistemin altında olan aktrisanın ayaqlarına düşüb, ona yalvarır ki, qurban olum, məni bağışla, iki yetim saxlayıram”.
Aktrisa ona səhv müalicə edən həkim barədə heç vaxt hüquq-mühafizə orqanlarına müraciət etməyib. “Mən elə insan deyiləm. Bu yaşa çatmışam, polis, məhkəmə, prokurorluq yolu bilməmişəm. Elə şeyləri də sevmirəm. Amma gərək o, məni bu günə qoymayaydı”.
***
Aktrisanın ölümündən sonra sosial şəbəkələrdə oğlu Elçin haqqında xoşagəlməz sözlər yayıldı. Bir çoxları onu anasına baxmamaqda günahlandırdı. Oğlunun mətbuata müsahibə verməməsi isə bu şayiələri daha da genişləndirdi. Lakin Elçin bildirib ki, o, işi ilə əlaqədar uzaqda olduğundan anasının yanına gec-gec gəlsə də, maddi cəhətdən onu təmin edib, vaxtı-vaxtında həkimə müayinəyə aparıb, ona baxıcı və sürücü də tutub.
Gülnar Salmanova ömrünün son günlərində xəstəliyi ilə bağlı verdiyi açıqlamalar çoxlarının xatirindən çıxmayıb: “Çox pisəm. Böyrəklərim sıradan çıxıb, həftədə iki dəfə dializə qoşuluram. Xəstəxanaya güclə aparırlar məni. Dializə qoşanda da, inanın ki, halım pisləşir, ürəyim gedir. İynə vurub güclə özümə gətirirlər. Ölmək istəmirəm, teatrda fəaliyyətimi davam etdirmək istəyirəm, o qədər tamaşalarım qalıb ki. Hamısı məni gözləyir. Mən iki böyrək istəmirəm, birini tapıb dəyişsinlər. Yoxsa ki, ömrümə çox az qalıb. Xanımdan sonra növbə mənimdir, qoymayın ölməyə”.
***
Teleaparıcı İradə İsaq Gülnar Salmanovanın son anlarını belə xatırlayır: "Ölənə yaxın Elçin, İradə, "behişt" sözünü təkrarlayırdı. Xəstə insan üçün "behişt" sözünü demək çox çətin idi. Dünyasını dəyişən günü həyat yoldaşını çağırdı. Onu gördü və son dəfə üzünə baxıb canını tapşırdı. Canını çox çətin tapşırdı. Elə bil ki, yoldaşını gözləyirdi. Amma bizə onu gözlədiyini demədi. Axırıncı günlər atasından danışırdı və deyirdi ki, ata, məni bağışla. Daha çox oğlu Elçindən danışırdı. Elçinlə nəfəs alırdı. Oğlu həmişə yanında olurdu və xəstələnən zaman da birlikdə xəstəxanaya apardıq".
Uzun xəstəlikdən sonra əməkdar artist, Dövlət Musiqili Teatrının aktrisası Gülnar Salmanova 24 oktyabr 2015-ci ildə yerləşdirildiyi 3 saylı Şəhər Kliniki Xəstəxanasında 58 yaşında vəfat edib.
