Arxeoloqlar Perunun şimalında yerləşən Barranka vilayətində 3500 il yaşı olan qədim şəhər aşkarlayıblar.
Kulis.az xəbər verir ki, qədim Peniko şəhərinin eramızdan əvvəl 1800–1500-cü illər arasında — Yaxın Şərqdə və Asiyada erkən sivilizasiyaların çiçəkləndiyi dövrdə salındığı güman edilir. Arxeoloqların fikrincə, bu şəhər Sakit okean sahilindəki erkən icmaları And dağları və Amazon hövzəsinin sakinləri ilə birləşdirən əsas ticarət mərkəzi olub.
Arxeoloq Rut Şeydinin fikrincə, bu kəşf Amerikanın ən qədim sivilizasiyası sayılan və iqlim dəyişiklikləri fonunda yoxa çıxmış Karal sivilizasiyasının taleyini anlamağa kömək edir. Güman edilir ki, Karal digər erkən sivilizasiyalardan — Hindistan, Misir, Şumer və Çindən təcrid olunmuş şəkildə inkişaf edib.
Qeyd edək ki, Peru Amerikanın ən mühüm arxeoloji tapıntılarının vətənidir. Aprel ayında Perunun sahilində, Karal sivilizasiyasının yüksək təbəqələrinə mənsub olduğu güman edilən beş min illik bir qadın cəsədi aşkar edilmişdi.
