Hollivudun məşhur aktrisası Keyt Blanşett Oksford Universitetinin yeni dəvət olunmuş professoru təyin edilib.
Kulis.az xəbər verir ki, ikiqat "Oskar" mükafatçısı 2026/2027-ci tədris ili ərzində universitetin Müqəddəs Ketrin Kollecində müasir teatrdan dərs deyəcək.
Müasir Teatr üzrə Dəvətli Professor vəzifəsi 1990-cı ildə təsis edilib. Ötən illər ərzində bu nüfuzlu kürsüdə Ser İan Makkellen, Dama Mayra Syal və Dama Dayana Riqq kimi böyük sənətçilər yer alıb.
Təyinatı ilə bağlı danışan 57 yaşlı avstraliyalı ulduz bu fürsəti böyük coşqu ilə qarşıladığını bildirib:
"Dəvətli professor olmaq mənim üçün növbəti nəsil mütəfəkkirlər və yaradıcı insanlarla birbaşa, güclü yaradıcı dialoq qurmaq üçün həyəcanverici bir fürsətdir. İncəsənət təxəyyülümüzün sərhədlərini və hüdudlarını dağıdır; o, suallar doğurur, onunla oynamaq və onu təhlil etmək hazırkı reallığımızı genişləndirir və ona meydan oxuyur. Çoxillik yaradıcılıq təcrübəm mənə hissləri ideyalara çevirmək imkanı verib və yeni fikirlərə aparan yollar açıb."
