Bu günlərdə sosial şəbəkələrdə aeroportda su istəyən uşağa kömək etməsi ilə bağlı yazdığı statusla kütləvi şəkildə tənqid olunan Xalq yazıçısı Çingiz Abdullayev yenidən bu mövzu üzərinə qayıdıb və öz profilində belə bir status yazıb:
“Dünən inanılmaz hadisə baş verdi. "Port Baku"-da yerləşən qarajda bir gənclə rastlaşdım. Cavan oğlan mənə yaxınlaşaraq bu sözləri dedi: "Son vaxtlar Sizə qarşı sosial şəbəkələrdə qıcıqlandırıcı rəy bildirən insanların adından Sizdən üzr istəyirəm". Həmin vətəndaşın adını soruşmağa belə vaxtım olmadı. Daha sonra "Paşa Bank"- ın yaxınlığında rastıma təxminən qırx yaşlı bir xanım çıxdı. Həmin xanım mənə bu fikirləri bildirdi - "Bu insanlarla tolerantlıq etdiyimiz üçün hamımızı bağışlayın". İnsanların mənə olan münasibətini bu iki nəfərin timsalında anladım. Mən fəxr edirəm ki, Xalq yazıçısıyam. Qeyd edim ki, SSRİ ədəbiyyatı tarixində və müasir Azərbaycanın ədəbiyyatı tarixində bu fəxri ada layiq görülmüş ən gənc yazıçıyam. Çirkin qəlbli insanlar mənə istədikləri qədər təhqiredici rəylər yaza bilərlər. Artıq fikir verməməyə çalışacam. MƏN ÇİNGİZ ABDULLAYEVƏM”.
