İsveç Krallığının ölkəmizdəki səfirliyi və Azərbaycan Kinematoqrafçılar İttifaqının birgə əməkdaşlığı çərçivəsində Bakıda İsveç film günləri başlayır.
Kulis.az xəbər verir ki, filmlərin nümayişi noyabrın 7, 4, 21 və 28-də “Azərbaycan” CinemaPlus-da təşkil olunacaq.
Festivala Erik Poppenin “Emiqrantlar” tammetrajlı bədii filmi ilə start veriləcək. Film ailəsi ilə birlikdə İsveçdən Amerikaya mühacirət edən Kristina Nilssonun həyatından bəhs edir. “Yenidən başlamaq. Özünü yenidən yaratmaq. Bu mümkündürmü? Biz hansısa yeni ölkəyə köçürük, yoxsa ölkə bizə?” Kristina, ömrü boyu bu suallara cavab axtarır.
Noyabrın 14-də nümayiş olunan ikinci film Tarik Salehin “Cənnətdən gələn oğlan” tammetrajlı bədii filmidir. Film Qahirədə Əl-Əzhər Universitetində təhsil alan Adəmin dini və siyasi mübarizənin qurbanına çevrilməsindən bəhs edir.
Noyabrın 21-də Sanna Lenkenin “Komediya kraliçası” tammetrajlı bədii filmi nümayiş olunacaq. 13 yaşlı Saşa stendap-komediyaçısı olmaq istəyir. Onun əsas məqsədi, anasının vəfatından sonra üzü gülməyən atasını güldürməkdir.
Sonuncu film noyabrın 28-də Lasse Hallströmün rəssam qadın Hilmanın həyatından bəhs edən “Hilma” tammetrajlı bədii filmi olacaq. Film onun uşaqlıq dövründən başlayır və qəhrəmanın sənəti bütün dinlərə və mədəniyyətlərə mənsub insanlarla əlaqə quranda bitir.
Filmlər orijinal dildə Azərbaycan dilində altyazılarla nümayiş olunacaq.
