Bu gün istiqlal şairi, dövlət himninin sözlərinin müəllifi Əhməd Cavadın doğum günüdür. Kulis.az bu münasibətlə “Günün şeiri” layihəsindən şairin “Azərbaycan” şeirini təqdim edir. Xatırladaq ki, Səməd Vurğunun məşhur “Azərbaycan” şeirini bu şeirdən plagiat etdiyi haqda iddialar mövcuddur. Məlumat üçün bildirək ki, Əhməd Cavad şeiri 1919-cu ildə, Səməd Vurğun isə ondan 14 il sonra - 1933-cü ildə qələmə alıb. Ən maraqlısı, şeirlərdə eyni misralar vardır.
Dağlarının başı qarlı,
Sinəsi yaşıl ormanlı!
Dərələrin şirin barlı,
Azərbaycan! Azərbaycan!
Səhraların sünbüllüdür,
İl müdam üstü güllüdür!
Bağçaların bülbüllüdür,
Azərbaycan! Azərbaycan!
Durna gözlü bulaqların,
Cənnət kimi yaylaqların!
Geniş-geniş oymaqların,
Azərbaycan! Azərbaycan!
Ormanında maral gəzər,
Çöllərində ceyran süzər!
Göllərində qazlar üzər!
Azərbaycan! Azərbaycan!
İlxında ayğır kişnəşir!
Naxrında buğan güləşir!
Süründə əmlik mələşir!
Azərbaycan! Azərbaycan!
Qayaların əlvan mərmər!
Belində var qızıl kəmər!
Bir yanında Bəhri-Xəzər!
Azərbaycan! Azərbaycan!
Sinən odu şölə salır!
Dünya səndən işıq alır!
Verməyəndə, zülmət qalır!
Azərbaycan! Azərbaycan!
İpək, pambıq, yunun çoxdur!
Arpa, buğda, dügün çoxdur!
Hər şeyin var, nəyin yoxdur?!
Azərbaycan! Azərbaycan!
Yer üzündə yoxdur tayın!
Gur-gur axar neçə çayın!
Bol veribdir, fələk payın!
Azərbaycan! Azərbaycan!
Laçının var, tərlanın var!
Çoxlu şirin dastanın var!
Qorxun yoxdur, düşmanın var!
Azərbaycan! Azərbaycan!
Gəncə, 1919
