2020-ci ilin fevral ayında Özbəkistandakı Heydər Əliyev adına Azərbaycan Mədəniyyət Mərkəzinin (AMM) elan etdiyi “Qarabağ - Azərbaycan mədəniyyətinin beşiyi” adlı mədəniyyət layihəsi çərçivəsində “Hər anımız Vətən desin!” adlı şeir müsabiqəsi başa çatıb.
Azərbaycan və Özbəkistandan müsabiqəyə təqdim olunan şeirlərin müəlliflərinə AMM-in fəxri diplomları, pul mükafatları təqdim ediləcək.
Müsabiqəyə əsasən Azərbaycan və Özbəkistan ədəbiyyatının nümayəndələrinin Vətənə və torpağa məhəbbət, Azərbaycan mədəniyyətinin mərkəzi olan Qarabağın tarixi, abidələri, Azərbaycan xalqının Qarabağda yaratdığı böyük mədəniyyət, adət-ənənələr, tanınmış qarabağlılar, ədəbiyyatımıza və muğam sənətinə bölgənin verdiyi töhfələr, Qarabağın gözəl və füsunkar təbiəti, Vətən torpaqlarının azadlığı, zülmə və həsrətə son, çiçəklənən Azərbaycan, həqiqətin zəfərinə və işıqlı gələcəyə inam mövzularını əhatə edən əsərlərə, şeirlərə, poemalara üstünlük verilib. Müsabiqənin birinci mükafatı Azərbaycanın İsmayıllı rayonunun Diyallı kəndinin müəllimi, şair Oktay İsmayıllının (ölümündən sonra) "Mələklərin soyqırımı" və Özbəkistanın "Kitab dünyası" qəzetinin baş redaktoru, şairə, tərcüməçi Xasiyyət Rüstəmin "Adı Lalə idi o qızın" poemalarına verilib.
Müsabiqənin qalibləri adına Azərbaycanın gənc şairi Tural Turan və özbəkistanlı şairə, tərcüməçi Qulzira Sharipova layiq görülüb. Müsabiqənin digər qalibləri Azərbaycandan Prezident mükafatçıları, şair İbrahim Yusifov və “525-ci qəzet” və “Bütöv Azərbaycan” qəzetlərinin əməkdaşı Mina Rəşid, Özbəkistan tərəfindən isə Yazıçılar Birliyinin üzvü Faroqat Xudoyqulova, dosent, Özbəkistan Yazıçılar Birliyinin üzvü Athambek Alimbekov, şairə, tərcüməçi Dilorom Murotova və Uktamoy Xaldarova olub. Bundan başqa, müsabiqənin xüsusi mükafatçıları da seçiliblər. Azərbaycandan şairlər Fərid Hüseynə və Şahməmməd Dağlaroğluna xüsusi mükafat təqdim olunacaq. Mərkəz müsabiqə çərçivəsində hər iki ölkənin şairlərinin və həvəskar şeirsevərlərin Qarabağa həsr etdikləri ən maraqlı və gözəl şeirlərinin, poemalarının toplu halında nəşrini də planlaşdırıb.
AMM-in direktoru Samir Abbasov bildirib ki, müsabiqə 44 günlük Vətən müharibəsindən öncə elan edilib. Bu səbəbdən də təqdim olunan şeirlərdə daha çox Qarabağın təbiəti, Azərbaycan xalqının Qarabağda yaratdığı mədəniyyət, ədəbiyyat, xalqımızın məruz qaldığı təcavüz və işğal faktı öz əksini tapıb. O bu il Azərbaycanın apardığı Vətən müharibəsi, əldə etdiyi zəfər və xalqımızın yazdığı qəhrəmanlıq salnaməsi ilə bağlı da şeir müsabiqəsinin elan ediləcəyini bildirib. /azertag.az/
