Bu günlərdə Mədəniyyət və Turizm Nazirliyi gənclər üçün qısametrajlı bədii filmlər müsabiqəsi elan edib. Müsabiqənin şərtləri ilə bağlı bəzi qaranlıq mətləblərə aydınlıq gətirmək üçün nazirliyin kinematoqrafiya şöbəsinə müraciət etdik. Suallarımıza şöbənin aparıcı məsləhətçisi Elşad Ərşadoğlu cavablandırdı.
- Müsabiqənin məqsədləri haqda nə deyə bilərsiniz?
- Mədəniyyət və Turizm Nazirliyi ilə “Azərbaycanfilm” kinostudiyası tərəfindən vaxtaşırı gənclər üçün müsabiqələr elan olunur və seçilən layihələrə film çəkilməsinə şərait yaradılır. Düzdür, bu müsabiqələrin əksəriyyəti sırf ssenari müsabiqəsi olur. Hazırda elan olunan bir qədər fərqli formatda, qısametrajlı film layihələri müsabiqəsidir. Bu və ya buna yaxın formatda müsabiqənin keçirilməsi əvvəllər Nazirliyin praktikasında olub və özünü doğruldub. 2007-2011-ci illərdə keçirilən “Bu meydan, bu ekran” çoxlarına məlumdur. Həmin müsabiqə çərçivəsində 20-dən çox qısametrajlı film çəkilib. Böyük əksəriyyəti də uğurlu filmlərdir. Bu filmləri çəkən gənc rejissorların bir çoxu sonradan dövlət dəstəyi ilə böyük filmlər çəkiblər. Bu gün milli kinoda imzasını təsdiq etmiş bir çox rejissorlar kinoda ilk addımlarını məhz “Bu meydan, bu ekran”da atıblar. Kinoda çalışan gənclərin yaradıcılıq fəaliyyətini stimullaşdırmaq, milli-mənəvi və ümumbəşəri dəyərləri kino vasitəsi ilə təbliğ etmək məqsədilə hazırda elan olunan müsabiqə də “Bu meydan, bu ekran”a yaxın formatda bir müsabiqədir. Bu müsabiqəyə ssenari ilə yanaşı filmin rejissorunun və prodüserinin gələcək film haqqında şərhləri, filmin təxmini və azbüdcəli smeta dəyəri, istehsal müddəti, layihəni təqdim edən prodüser mərkəzi haqqında məlumatlar da təqdim olunmalıdır. Qalib layihələrə filmlər Nazirliyin sifarişi ilə “Azərbaycanfilm” kinostudiyasının istehsalat bazasında və kinostudiyanın maliyyə təminatı ilə çəkiləcək. Filmlər həmin layihələri təqdim etmiş şirkətlər tərəfindən çəkilərək onların istehsalı kimi təqdim olunacaq.
- Şərtlərdə göstərilib ki, müsabiqədə yalnız film istehsalı ilə məşğul olan prodüser mərkəzləri iştirak edə bilər. Bu tələb ssenaristlərin və ya ssenari yazmaq arzusunda olanların iştirakını məhdudlaşdırmır ki?
- Xeyir, məhdudlaşdırmır. Düzdür, müsabiqədə müstəqil kino şirkətləri iştirak edə bilər. Ancaq həmin şirkətlər də məhz ssenaristlərin işlərini təqdim edirlər. Ssenaristləri bu işə cəlb edirlər. İnternetdə prodüser mərkəzləri haqqında məlumatlar var. Ssenaristlər prodüser mərkəzləri ilə əlaqə saxlayıb, ssenarilərini onlara təqdim edə bilərlər. Prodüser mərkəzləri özləri də müsabiqədə qalib gəlmək üçün yaxşı ssenarilər axtarıb tapmaqda maraqlı olacaqlar.
- Müsabiqədə xarici şirkətlər də iştirak edə bilər?
- Bəli. Ancaq təbii ki, müsabiqə Azərbaycanın dövlət qurumu tərəfindən keçirilirsə təqdim olunan ssenari də Azərbaycanla bağlı olmalıdır. Hətta ssenari başqa dillərdə də ola bilər, lakin sonda film Azərbaycan dilində çəkilməlidir.
- Yaş məhdudiyyəti 35-dir...
- Bu məhdudiyyət prodüser və rejissorlar üçün nəzərdə tutulub. Ssenaristlər digər yaradıcı heyət üzvləri üçün yaş məhdudiyyəti yoxdur.
- Bəs mövzu məhdudiyyəti necə, varmı?
- Xeyir, mövzu seçimi sərbəstdir. Bu gün bizdə aktual olan müharibə, Qarabağ, uşaq, gənclər, sosial-ictimai və s. istənilən mövzuda layihə təqdim etmək olar, yetər ki, mövzuya yanaşma, onun təqdimatı orijinal, işıqlı və maraqlı olsun. Mən fürsətdən istifadə edib bir məlumat da vermək istəyirəm. Dekabrın 19-da saat 11-də Nizami Kino Mərkəzində müsabiqədə iştirak etmək arzusunda olan ssenarist, prodüser və rejissorları maraqlandıran məsələlərlə əlaqədar təşkilatçılarla tövsiyə xarakterli görüş keçiriləcək. Müsabiqə ilə bağlı istənilən məsələ haqqında daha ətraflı məlumat əldə etmək istəyən hər kəs buyurub həmin görüşə gələ bilər.
