"Warner Bros." studiyası Marqo Robbi və Rayan Qoslinqlə böyük müqavilələr bağlamağa hazır deyil.
Kulis.az xəbər verir ki, bu barədə "The New York Times" nəşri məlumat yayıb.
Ken roluna görə "Oskar"a namizəd olan Qoslinq 20 milyon dollar qonorar almaq istəyir. Halbuki o, filmin birinci hissəsində 12,5 milyon dollar qazanmışdı.
Əvvəlcə aktyorlar yalnız bir film üçün müqavilə imzalamışdılar, lakin indi rejissor Qreta Qerviq və onun həmmüəllifi Noa Baumbakın film üçün yeni bir ideyası var. Yaradıcılar şərtləri razılaşdırmayana qədər bu ideyanı açıqlamırlar.
Bununla belə, studiyanın vaxtı azdır: franşizanın hüquqları artıq dekabr ayında "Mattel" şirkətinə qayıdacaq. Əgər tərəflər razılığa gələ bilməsələr, "Mattel" hər şeyə yenidən, yeni rejissor, aktyorlar və tamamilə fərqli konsepsiya ilə başlamalı olacaq.
Vəziyyət iştirakçıların iş qrafiklərinin sıxlığına görə daha da qəlizləşir. Robbi "Ouşenin on bir dostu" (Oceans Eleven) filminin prikvelində çəkilir (2027-ci ilin iyununda nümayiş olunacaq), Qoslinq isə "Ulduz müharibələri" (Star Wars) layihəsinin promo-kampaniyasını aparır (28 may 2027-ci ildən prokatdadır) və 2028-ci ildə "Marvel"in "Kabus sürücü" (Ghost Rider) layihəsində çəkilməyi planlaşdırır.
"Barbi" filmi haqqında
"Barbi" (Barbie) — 2023-cü ildə Qreta Qerviqin rejissorluğu ilə çəkilmiş, "Mattel" şirkətinin eyniadlı qlobal gəlincik xəttinə əsaslanan məşhur Amerika komediya və fentezi filmidir. Ekran işində baş rolları Marqo Robbi (Barbi) və Rayan Qoslinq (Ken) canlandırıb. Layihə qlobal prokatda 1,4 milyard dollardan çox gəlir əldə edərək 2023-cü ilin ən çox qazanan filmi olub, eyni zamanda bir neçə nominasiya üzrə "Oskar" mükafatına layiq görülüb.
