Kulis.az Amil Məmiyevin yeni şeirlərini təqdim edir.
***
Bəlkə də kiminsə uzaqlara gedib
tək qalmaq istədiyi yerlərin adamları da
Uzaqlar dediyi buralara gəlib
tək qalmaq istəyirlər burda.
***
Ən çox yaşayan məsdər - Ölmək.
***
Aylı, ulduzlu bütün göylər
“paqon”dur Allahın çiyinlərinə.
***
Kütlə ölçü vahididir,
vahidsə kütləni ölçən.
***
Milçək ölməmək üçün mütləq
milçəköldürənin üstünə qonmalıdır.
***
Qadında bir dərinlik,
kişidə artıqlıq var.
Bəlkə də elə əvvəl
bitişik olub hər ikisi.
***
Moskva
2014
Bir cavan oğlan,
bir yaşlı rus qadın
Şam aldılar dükandan.
Birinin ad günü idi,
birinin ərinin qırxı.
İndi çox güman şamı
Birində yandırdılar,
birində üfürdülər.
***
Mən, yamyaşıl çəmənlikdəki otam.
Ya qoyunlar yeyər başımı, quzular otlayar.
Ya sevgililər oturar üstümdə.
Ya uşaqlar yolar ya ayaqlar əzər
Ya şeh damcıları düşər gövdəmə.
Ya gur yağışlar yağar,
Ya qarışqalar dırmaşar başıma.
Ya çiçəklər bitər yanımdan,
Ya günəş yandırar, sapsarı saraldar məni.
***
Əvvəl
mən sənə baxdım.
Sonra
sən mənə ömür boyu.
***
Özüm-özümə elə tanış gəlirəm,
elə bil hardasa görmüşəm özümü.
***
O qədər xəyalımda qurdum ki
O qədər yuxumda gördüm ki
O qədər ağlımdan keçirtdim ki
Artıq doydum səndən.
İndi gerçəkdə görməyə səni
O qədər acizəm ki,
Qorxuram
xəyalımdakı kimi yox
yuxumdakı kimi yox
ağlımdakı kimi yox
başqa cür olasan.
Hər şey belə yolundaykən
Qorxuram yaxınlaşmağa sənə.
Bağışla məni nolar,
İnsanları tanımaq olmur,
Onlardan qorxuram.
