Kulis.Az Həyat Şəminin yeni şeirlərini təqdim edir.
SUNAMİ
Hərdən
çıxıram şəhərdən...
Xəzərin yanına gedirəm,
kəsdirirəm dizinin dibini.
O da: həm dəryadı,
həm də bircə damladı...
qalxıb üzümə su vurur hərdən.
Səni soruşuram,
Deyir, daha dəymir mənə,
ağıllanıb...
Son dəfə sunami oldu,
yuyub apardı hər şeyi:
səni, məni...
sənin sevmədiyin telefonunu,
mənim sevdiyim arabamı,
qulağımdan dodaqlarını,
daşımı, yaddaşımı,
fikirlərimi,
ağırlığımı-uğurluğumu...
Elə yüngülləşdim ki –
hər şeyim Səndin...
Azad oldum bu dünyadan,
Səndən, məndən...
yox olduq...
Durub evə gəldim,
gördüm ki, evdəsən...
Ay da!!!
Sunami olsun
bu Sevgiyə!
YENİ ŞEİRLƏRİM VAR SƏNƏ
Yeni şeirlərim var sənə,
Dünən bir uşaq
əlində pozan –
Qoy gözünün yaşını silim – dedi.
Gecə saat 10 radələrində
bir avtomobil qəzaya uğrayıb
aeroport yolunda...
yanında sərnişin də vardı,
nicat idi adı...
eşitdim,
ürəyim çatdadı.
Bu gün havam yaxşı olacaq,
efirdə gördüm səni.
“Ümid var” da bağlandı...
Sabah
mən olmayacam...
Bu gün də gecdi...
Görüşməyənədək!
DAĞILMIŞ HƏRFLƏR
Zaman
yüyürür irəliyə doğru
uçur, uçur...
bircə dəqiqəlik təmənnam var
səni görmək üçün...
Oxuyum üzündəki
dağılmış hərflərin
sirrini...
Açım
sevdiyim gözlərini,
görüm rəngini dünyanın.
Dadına bax göz yaşlarımın,
hər damlasında sən varsan...
duzlu-duzsuz...
Dərin-dərin
köksümün dibindən
çıxar nəfəsimi,
boğuluram sənsiz...səssiz...
qaşlarımın çatılan yerinə bax,
yetmədiyim arzularımın izi...
Səsimi nota sal,
oxumadığım layla qorxusu,
sənli günlərimin
qoxusu
düyünlənib boğazımda..
Yenə
sığal çək saçlarıma,
ürəyini hiss edim,
hər telimdə sızıldayan kaman səsi...
Harda gizlədim səni,
necə qoruyum hər kəsdən,
mərəzdən...
Necə çatım köməyinə?
gəl saxlayım səni...
Səssizcə içəri keç -
Ürəyimə...
RƏNGLƏ DUYURUQ
Rənglə duyurduq yağışı,
göyün üzü qaralanda...
Yağışdan sonrakı
göy qurşağını...
islanmış torpağı, daşı
rəngli qoxusundan duyurduq.
Rənglə duyurduq ölkələri,
bayraqların libasında...
qırmızısı, sarısı var...
narıncısı var.
rənglə duyurduq yaşımızı,
saçımızın bəyazından...
ömrümüzün yazında...
Rənglə duyurduq hərəkəti,
Yaşılı çox sevirdik
sükan arxasında.
Rənglə duyurduq yolu,
Aramızda yollar, rənglər, xətlər vardı.
Ciddi-ciddi qoşa xətlər
kişi rəngində, kəsmək olmaz.
Qırıq-qırıq qadın xətti
Könül kimi...
Küçələrə döşənmiş istiqamət oxları-
uşaq xəttidir,
göstərəcək sənə gedəcəyin ünvanı...
Rənglə duyurdum
yanaqlarındakı sözü...
Rənglə duyurdum Səni,
sən rəngliydin
Göy qurşağım!!!
ADAM OLMADI BİZDƏN
Evcik-evcik oynadıq,
ev qurduq özümüzdən...
böyüyüb uşaq olduq,
Adam olmadı bizdən...
Ən şirin oyuncağın,
gəlinciyin də məndim,
min yol qolumu qırdın,
bir qol da incimədim...
Görən indi hardasan?
Gəlmirsənsə özün bil,
Tulladığın gəlinciyi,
Yol gözləyən qızın bil...
Mənsə ürəyim dolu
Su atmışam dalınca...
Oh, yamanca susadım,
Ürəyim boş qalınca...
QOXLA MƏNİ
Mən bir gözəl mələk olum,
Yuxularda yoxla məni...
Kipriklərin yorulanda,
Ürəyində saxla məni.
Aç qolların uzanınca,
Hicran yaşanarmı bunca?
Sarıl boynuma doyunca,
Nəfəs-nəfəs qoxla məni.
Ayrılıq məni dağlayar,
Gözlərim yosun bağlayar,
Anam yox, məni ağlaya,
Nə olar, gəl, ağla məni...
Qov, dağılsın qara bulud,
Ağlamağı unut, unut...
Yum gözünü, bir arzu tut,
Tut, bir də buraxma məni...
DİALOQ
- Sizdə təkliyə xırda olmaz?
- Bizdə həmişə təklikdir...
- Gəl evlənək, sən darıxmamaq üçünsən...
- Darıxmağı sevirəm axı.
- Kişisiz necə yaşayırsan?
- Kişi kimi....
- Ürəyim səni istəyir...
- Ürəyin var sənin?
- Bilmirəm, sol tərəfimdə nə isə hürür.
- Mən hardayam? It hürən yerdə, yoxsa işıq gələndə?
- It hürən yerdəsən, ulayırıq..
- Ulama, birinə ulaş!
- Sənə ulaşmaq istəyirəm... bağla gözlərimi, uzat əlini...
- Aç köynəyimi Kərəm kimi...
- Yeni roman yazıram.
- Məni də romanına sal.
- Bileti 10 manatdır.
- Mənə iki bilet ver..
- Kiminlə gələcəksən?
- Sevdiyimlə...
- Hələ də onu sevirsən? Görüşürsünüz?
- Romanda görüşəcəyik də....
DUYĞULARI ÜZÜRSƏN
Hərdən yazırsan, dostum!
sonra niyə pozursan?
İncidirsən sözləri,
duyğuları üzürsən...
Qoparmaq istəyirsən
köksümdən izini də?
Yalan yaza bilmirsən,
yazma heç düzünü də.
Məndə sənin boşluğun
olmasın heç - demişdin...
Kimsələri düşünmə,
özünü seç demişdin.
Öz əlinlə qoyduğun,
qaydaların yerində,
Barmaqların yığacaq
bəlkə günün birində!...
Hardasan indi görən,
kimin ürəyindəsən?
Əynini qalın elə,
Soyuqdur, üşüyərsən...
Yatmamısan, yazırsan...
dünyanı unuduram.
Boğazın qəhərlənib,
acısını dadıram.
Qələmlərin ömrünü
yeyir hər gün hərflər...
Mən səni axtarıram,
gözlərimdə görüblər...
31.01.2014
ELƏ ŞİRİN SUSMUSAN
Elə şirin susmusan,
oyatmaq istəmirəm.
Acıyla doğmalaşdım,
Oy, atmaq istəmirəm...
Dünya, sənin üzündən
közərən atəşim var.
Bağlama gözlərini,
gör nə qədər işim var!
Kimin üçün qalanır
ürəyimdə ocaqlar?
Ayağına gəlmişəm,
Dur, boyumu qucaqla.
Səni sevmək, ay canım,
Canımdan ağır yükdü...
Ən böyük günahdan da
yenə Allah böyükdü...
09.03.2014
