Kulis.az “Bazar oxusu” layihəsindən Musa Yaqubun “Klassiklərə bənzətmə” şeirini təqdim edir.
Qapında əyilib suala döndüm,
Səndən alacağım cavaba görə.
Allahım heç sənə əzab verməsin,
Sən mənə verdiyin əzaba görə.
Üzüb hər ümiddən əlimi sənsiz,
Dünyanın gedimi, gəlimi sənsiz,
Daha istəmirəm könlümü sənsiz,
Baxıb biganələr xaraba görə.
Düşməzmi güzarım bir dost bağına,
Sevda çiçəklərim düşüb qırğına,
Yamanca tuş oldum el qınağına,
Təsəlli tapdığım şəraba görə.
Elə bil ürəklər daşdı, dəmirdi,
Bir üzü ağ küldü, biri kömürdü,
İlahi, bu necə yalqız ömürdü,
Qoymaram bu ömrü hesaba girə.
Öz eşqim yolunda sadiq canam mən,
Heyf oldum, həm yanan, həm yamanam mən.
Bəlkə də, birinci müsəlmanam mən,
Cəhənnəm çəkirəm savaba görə...
Allahım heç sənə əzab verməsin,
Sən mənə verdiyin əzaba görə.
Digər şeirlər
Nəriman Həsənzadə “Nə qəribədir”
Vaqif Bayatlı “Qardaşım ağaclar”
Salam Sarvan “Bağışla, otağim tör-toküntüdü”
Səməd Vurğun “Mən tələsmirəm...”
Vaqif Səmədoğlu “Əlin sınaydı sanitar”
Ələkbər Salahzadə “Bir də gördün”
Məmməd Rahim “Saldı qara gözlərin”
Bəxtiyar Vahabzadə “Bir salama dəymədi”
Vaqif Bayatlı Odər “Ölümdən sonra başlar şair ömrü”
Eldar Baxış "Gecənin bir aləmi"
Tofiq Bayramın “Ay gecikən məhəbbətim”
Ramiz Rövşənin Məhəmməd Hadiyə həsr etdiyi şeir
Rasim Qaraca. "Əgər ən yaxın dostun"
Vaqif Səmədoğlu. "Sevgilim mən öləndə"
Məmməd Araz. “Ana yurdum, hər daşına üz qoyum”
