Kulis.az şair Nazim Əhmədlinin yeni qələmə aldığı “Eşqin dərgahına qul olan könül” şeirini təqdim edir.
eşqin dərgahına qul olan könül,
bir gün yıxılarsan qul ağrısından;
açılar butalar, çəkilər duman,
düşər çiyinlərin yol ağrısından;
ruhuma bir dəli nağıl pıçılda,
başıma azacıq ağıl pıçılda;
məni səhralardan çağır, pıçılda,
canımı qurtarım çöl ağrısından;
nədi bu qovğalar, axır, nə bilim,
üzümə kim necə baxır, nə bilim;
hərdən topuq çalır, karıxır dilim,
sözüm acı dadır dil ağrısından;
bu dərdi nə qədər oyum içimdə,
ölümün, itimin, toyun içində;
dünya çalxalanır suyun içində,
dağlar əyilibdi sel ağrısından;
daha nə qalıbdı, bu gələn yaza,
saçımda ağ duman, əlimdə əsa;
bu yol çəkib gedir üzü payıza,
atlar yorulubdu nal ağrısından;
hanı, qul olduğum eşqin dərgahı,
azıb itən yurdda anamın ahı;
tökmüsən üstümə min-bir günahı,
ağla ağrısından, gül, ağrısından.
Bakı şəhəri, 16 noyabr 2017.
