“Ümumi vəziyyətim yaxşıdır. Geriləmə yoxdur, ancaq irəliləyiş var. O şeylər ki zəhərə çevrilmişdi, dozadan artıq idi, artıq aşağı düşməyə başlayıb”.
Bu sözləri Kulis.az-a verdiyi açıqlamada hazırda xəstəxanada yatan şair Aqşin Yenisey deyib.
Aqşin Yenisey deyib ki, qaraciyərdəki bərkimə də düzəlməkdədir: “Bir az qabaq həkimlə danışdım. Deyir ki, yavaş-yavaş yumşalır.
Şair AYO-çulardan şikayət edib: “AYO-çulardan, bütün günü evimdə olanlardan heç kim gəlməyib yanıma. Nərmin Kamal mesaj yazıb, Murad Köhnəqala və Sevinc Pərvanə isə zəng edib. Qalanları nə yanıma gəlib, nə də zəng ediblər”.
Aqşin Yenisey deyib ki, bu vəziyyətə düşməyinin səbəbi özünə indi bəlli olur: “İndi mənə bəlli olur ki, bu adamlar mənim belə bir vəziyyətə düşməyimdə maraqlı olublar. Görünür ədəbiyyatda qalmaq istəyən bəzi adamlara mane olurmuşam. Buna görə də məni sıradan çıxarmaq arzusunda imişlər”.
Şair AYO-çuların yanına gəlməməyi ilə bağlı başqa bir versiya da irəli sürüb: “Ola bilər ki, vaxtilə kimlərsə mənim vəziyyətimə düşüb, mən onların yanına getməmişəm. Və yaxud kiminsə toyuna getməmişəm, onlar da bunu yadda saxlayıblar, indi yanıma gəlməməklə əvəz çıxmağa çalışırlar. Axı bəzi insanların qəlbində donuz zibilliyi var”.
Aqşin Yenisey bəzi şairlərin özünü xəstəliyə vura biləcəyindən qorxduğunu deyib: “Hətta qorxuram ki, bəzi şairlər mənə olan diqqəti görüb özlərini xəstəliyə vuralar”.
